DILI, 26 outubru 2022 (TATOLI)–Ministériu Edukasaun Juventude no Desportu (MEJD) liuhosi Diresaun Nasionál Patrimóniu Lojístika no Teknolojia (DNPLT) kontinua halo distribuisaun karteira eskolár (meza no kadeira) ba eskola sira iha territóriu nasionál, ne’ebé hosi karteira eskolár 20.000, prodús ona kuaze 8.600 no distribui ona.
“Ita-nia predisaun molok tinan ida ne’e ramata tenke atinje ona distribuisaun karteira eskolár 10.000 pares ba eskola sira iha territóriu nasionál. Tenke atinje 88% hanesan ne’e,” Diretór Nasionál Patrimóniu Lojístika no Teknolojia, Pedro Pinto dos Reis, hateten ba Agência Tatoli iha ninia knaar fatin, edifísiu MEJD, Vila Verde, kuarta ne’e.
Notísia relevante: MEJD distribui karteira eskolár 1.565 ba eskola 20 iha munisípiu tolu
Tuir Diretór, daudaun sira halo mudansa iha prosesu distribuisaun, ne’ebé antes ne’e Ministru hakarak karteira eskolár sira lori ba maka monta iha eskola ida-idak, maibé agora hafoin halo konfirmasaun ho Ministru, karteira eskolár sira monta kompletu kedan maka halo distribuisaun.
“Ministru aseita hodi karteira sira monta iha Ministériu depois maka distribui dala-ida de’it no maneira ida-ne’e maka agora parte diresaun halo iha prosesu distribuisaun ne’e,” nia akresenta.
Nune’e mós, bazeia ba planu, DNPLT sei halo tan distribuisaun karteira eskolár 150 ba eskola rua iha munisípiu Aileu maibé tanba iha difikuldade ho transporte, maka seidauk bele halo distribuisaun.
“Diresaun iha karreta truck 10 maibé haat ho kondisaun ladi’ak, entaun labele halo serbisu. Ita sei iha karreta neen maibé agora sei iha hela munisípiu sira tanba apoiu distribuisaun pontu ezame ba eskola sira iha munisípiu, ne’ebé aban karreta sira tun hotu ona, semana oin ita bele kontinua halo filafali distribuisaun karteira eskolár ba eskola sira,” nia tenik.
Jornalista : Tomé Amado
Editora : Julia Chatarina
