iklan

HEADLINE, MUNISÍPIU, VIQUEQUE

Benefisiáriu 37 UKL+B  hosi suku Uma Uain Leten sei simu kalen uma

Benefisiáriu 37 UKL+B  hosi suku Uma Uain Leten sei simu kalen uma

Mapa munisípiu Viqueque. Imajen/Espesiál

VIQUEQUE, 07 novembru 2022 (TATOLI)–Xefe suku Uma Uain Leten, postu administrativu Viqueque Vila, munisípiu Viqueque, Martinho Soares Gusmão, informa, benefisiáriu 37 Uma Kbiit Laek (UKL)+B sei simu matéria kalen uma.

“Benefisiáriu iha suku ne’e hamutuk 37. Aban (tersa to’o kuarta), Programa Nasionál Dezenvolvimentu Suku (PNDS) hahú distribui ona materiál kalen ba benefisiáriu sira hodi hadi’a uma ne’ebé ho kondisaun a’at,” Líder komunitáriu hateten ba Agência Tatoli, iha postu Viqueque Vila, segunda ne’e.

Materiál ne’ebé hetan depende ba benefisiáriu nia medida uma no iha prosesu verifikasaun konsege halo entrevista ba benefisiáriu sira.

“Hafoin administradór uza ninia kompeténsia, identifika hosi suku Uma Uain Leten iha uma-kain 37 hosi aldeia ualu mak sei sai benefisiáriu. Ha’u hanoin modelu distribuisaun materiál kalen ba komunidade tenke la’o nafatin hodi komunidade ne’ebé agora la hetan bele hetan filafali tanba balun hetan maibé balun seidauk hetan,” nia akresenta.

Notísia relevante: Governu distribui ona zinku ba benefisiáriu UKL+ 37 iha Hatulia B

Governu fó apoiu ne’e liuhosi programa nasionál UKL+B hodi hadi’a populasaun laiha kbiit nia uma.

“Ba oin, bainhira Governu apoia tan materiál ba komunidade karik labele ein jerál. Ita-nia komunidade ne’ebé iha posibilidade ka hetan ona osan  hanesan funsionáriu no veteranu sira labele simu. Ha’u prefere apoia sira ne’e ba futuru fó  ba komunidade ne’ebé laiha posiblidade atu hadia sira-nia uma,” Martinho Soares, sujere.

Suku Uma Uain Leten rejista funsionáriu no veteranu uma-kain ualu sei simu hotu kalen uma tanba tama kritériu.

Iha fatin ketak, Diretór PNDS munisípiu Viqueque, Higino Posinato Somar e Silva, hateten, lansamentu distribuisaun kalen uma sei realiza iha suku Uma Uain Leten no suku Fatudere.

“Aban halo lansamentu distribuisaun materiál ba benefisiáriu UKL+B sira. Distribui uluk ba suku rua maka distribui tan ba suku seluk tanba ita iha limitasaun,” nia tenik.

Iha postu administrativu Viqueque Vila iha suku hamutuk 10, ne’ebé kada suku iha benefisiáriu 37 maka sei simu kalen uma.

Jornalista   : Vitorino Lopes da Costa

Editora       : Julia Chatarina

iklan
iklan

Leave a Reply

iklan
error: Content is protected !!