iklan

KAPITÁL, POLÍTIKA

Komunidade uma kain 15.409 iha Cristo Rei seidauk simu cesta bázika

Komunidade uma kain 15.409 iha Cristo Rei seidauk simu cesta bázika

Produtu Cesta Bázika iha bote-laran Imajen TATOLI/Antónia Gusmão

DILI, 11 novembru 2022 (TATOLI)—Administradór postu administrativu Cristo Rei, munisípiu Dili, Venancio Tavares, informa daudaun ne’e komunidade uma kain hamutuk 15.409 iha postu administrativu Cristo Rei seidauk simu cesta bázika.

Komunidade uma kain 15.409 iha postu administrativu Cristo Rei ne’ebé seidauk simu cesta bázika, kompostu hosi suku Ailoc ho totál uma kain 1000, Balibar 354, Becora 4.710, Bidau Santana 1.582, Camea 3.265, Culu-hun 1.902, Hera 2.151 no Metiaut hamutuk 445.

“To’o agora ha’u seidauk hetan informasaun no kompañia ne’ebé manán konkursu atu fó cesta bázika ba Cristo Rei, tanba daudaun ne’e uma kain hamutuk 15.409 iha postu administrativu Cristo Rei mak seidauk simu cesta bázika,” Venancio Tavares hateten ba Agênxia Tatoli, bainhira partisipa iha sensibilizasaun programa estimulu empreendedorismu sosiál juventude suku, desportu komunitáriu no konstrusaun kampu komunitáriu ba Autoridade Munisípiu Dili (AMD), iha Caicoli, Díli, sesta ne’e.

Nia informa, ho prosesu ne’e komunidade iha Cristo Rei preokupa tebes ho situasaun refere, tanba komunidade iha postu administrativu balun simu ona maibé iha Cristo Rei seidauk.

“Ho situasaun ida-ne’e, ita-nia komunidade preokupa no ha’u-nia reposta mak ha’u seidauk hetan órariu informasaun kona-ba cesta bázika iha Cristo Rei. Maibé, ba ha’u, cesta bázika ne’e ida-idak nia direitu kedan ona atu aban ka bainhira de’it sempre nia hetan, tanba ne’e plánu fiksu tiha ona. Tanba ne’e, dadus ne’ebé daudaun iha Cristo Rei, ha’u submete ona ba iha Ministériu Administrasaun Estatál,” nia afirma.

Jornalista : Nelia Fernandes

Editór      : Cancio Ximenes

iklan
iklan

Leave a Reply

iklan
error: Content is protected !!