MAE fó atensaun ba komunidade hela iha fatin risku

DILI, 11 novembru 2022 (TATOLI)—Diretór Jerál Administrasaun Estatál (MAE), Belarmino Filomeno Neves, hateten MAE liuhosi Autoridade Munisipál Dili (AMD) fó atensaun ba komunidade Comoro, Becusse no Becora ne’ebe hela besik mota no foho lolon.
“Ita haree mota maibé ita nafatin halo uma iha mota laran. Bainhira ita halo uma ne’e atu asegura ita-nia moris no la’ós halo atu ba mate nian. Nune’e, ha’u husu atu autoridade lokál sira entidade hotu-hotu ne’ebé iha kapitál atu informa hela ba ita-nia sidadaun sira, liuliu sira-ne’ebé hela iha Comoro, Becusse no Bebora tanba besik mota,” Belarmino Filomeno hateten ba Agência Tatoli, iha salaun INAP, Dili, sesta ne’e.
Ho ida-ne’e, nia haruka ona karta ba AMD atu alerta ba komunidade ne’ebé mak hela besik mota ninin no foho lolon.
“Ha’u haruka ona karta ba ita-nia Autoridade Munisipál Dili (AMD) atu alerta ba ita-nia komunidade ne’ebé hela iha mota ninin no foho lolon tanba agora tempu udan ona,” nia hateten.
Tanba, to’o agora komunidade parte oeste nian ne’e laiha konxiénsia tanba kontinua halo uma iha mota laran no ninin sira inklui iha foho leten. Komunidade hatene hela udan ne’e mota estraga sasán inklui uma maibé sira nafatin halo uma, depois mak fó sala Governu no Estadu.
Entretantu, Prezidente AMD, Guilhermina Filomena saldanha hateten, to’o agora komunidade kontinua halo uma iha mota no foho lolon tanba bainhira hetan akontesimentu ruma, sira hakarak husu de’it ba Estadu no Governu maibé sira laiha obrigasaun.
“Komunidade seidauk iha obrigasaun nune’e husu atu iha obrigasaun no dever tenke tau hamutuk, nune’e iha konsiénsia hodi kontribui ba dezenvolvimentu,” nia dehan.
Jornalista : Osória Marques
Editór : Cancio Ximenes

