PR Horta-Falur diskute situasaun forsa aero iha Timor-Leste
DILI, 11 novembru 2022 (TATOLI)—Xefe Estadu Maiór Jenerál F-FDTL, Tenente Jenerál Domingos Raul “Falur Rate Laek” hasoru ma;u ho Prezidente Repúblika, José Ramos Horta, hodi dikuste kona-ba situasaun forsa no progresu dezenvolvementu forsa aero nian.
“Enkontru ho Prezidente Repúblika ne’e ami ko’alia kona-ba situasaun forsa aero, lojistika nian uitoan, liu-liu kona-ba progresu dezenvolvementu forsa aero nian ne’e mak ha’u relata ba Xefe Estadu kona-ba sira ne’ebé hetan formasaun iha Amérika atu fila-fali uza meiu sira-ne’ebé ita nia país parseiru dezenvolvementu forsa aero nian atu fó,” Tenente Jenerál Falur Rate Laek” hateten ba jornalista sira hafoin ramata enkontru ho Xefe Estadu iha Palásiu Prezidensiál Nicolau Lobato, Bairru Pite, sesta ne’e.
Nia dehan, sira ne’ebé tuir formasaun ne’e na’in-rua, ida pilotu, no seluk vou pilotu no aleinde ne’e ko’alia kona-ba prosesu manutensaun aeroportu nian.
“Ha’u dehan operasionalidade manutensaun nian, pessoál tékniku sira-ne’ebé atu apoiu ba iha aviasaun ne’e rasik halo hela formasaun iha Baucau,” nia dehan.
Entretantu, iha enkontru ne’e Prezidente Repúblika José Ramos Horta, nu’udar Komandante Supremu fó indikasaun depois saida mak forsa armada tenke halo atu hadi’a orden sira-ne’ebé fó.
Molok ne’e, pájina ofisiál Embaixadór Amérika iha Timor Leste katak haree F-FDTL nia aviaun foun Cessna, ekipa pilotu no manutensaun ida hosi F-FDTL no PNTL to’o ona iha Estadu Unidu Amérika semana ida-ne’e hodi hala’o formasaun kona-ba oinsá atu opera aviaun foun ne’e.
Nune’e, iha fulan hirak nia laran, ekipa refere sei halo formasaun no lori semo F-FDTL nia aviaun foun Cessna 206 iha Massachusetts hodi prepara ba simu aviaun Cessna ne’ebé sei entrega hosi Estadu Unidu ba Timor-Leste iha tinan 2023.
Tanba ne’e, Estadu Unidu Amérika orgullu tebes ba parseria ho Timor-Leste iha área seguransa marítima hodi servisu di’ak liután monitorizasaun ba territóriu, repsonde ba dezastre naturál no promove dezenvolvimentu ekonómia.
Jornalista : Osória Marques
Editór : Cancio Ximenes
