DILI, 17 novembru 2022 (TATOLI)–Operadór telekomunikasaun, Viettel Timor Uni, Lda ‘Telemor’, serbisu hamutuk ho Banco de sangue, Hospital Nacional Guido Valadares (HNGV), kinta ne’e, realiza atividade doasaun ran hodi komemora loron proklamasaun independénsia da-47 (28 novembru 1975).
Atividade ne’e hala’o durante loron-ida (kinta), iha Timor Plaza, ne’ebé partisipante sira mai hosi vizitante Timor Plaza, funsionáriu Telemor, inklui funsionár balun hosi Agência Noticiosa Timor-Leste-TATOLI, Institutu Públiku (TATOLI, I.P).
“Objetivu atividade ne’e maka atu ajuda ema sira ne’ebé presiza ran, tanba ne’e maka ami konvida sé de’it mak hakarak oferese-an hodi halo doasaun ran, ami agradese tebes. Eventu ne’e ami realiza hodi selebra loron proklamasaun independénsia,” Diretór Jerál Telemor, Pham Van Manh, informa iha ámbitu atividade doasaun ran, iha Timor Plaza.
Notísia relevante: Tinan 10 ezisténsia, Telemor promete kontinua moderniza setór telekomunikasaun
Telemor planeia mós atu realiza eventu hanesan iha munisípiu sira, iha tinan oin, tanba atividade ne’e hala’o ba dala-rua, dahuluk realiza ona iha Dili.
“Ami espera katak la’ós de’it kliente Telemor mak halo doasaun ran maibé sé de’it bele oferese. Atividade ne’ebé hala’o daudaun ami halo previzaun presiza ema to’o na’in-100, bainhira atinje ida-ne’e ami agradese tebes,” nia espera.
Biban hanesan, Xefe Departartamentu Banco de Sangue, Januário Freitas, agradese ba Telemor tanba ne’ebé iha inisiativa realiza atividade doasaun ran, ne’ebé bele ajuda ema moras ne’ebé presiza ran.
Maski nune’e, Januário Freitas dehan, stock ran ho tipu hanesan, A, B, AB, no O sufisiente hela hodi korresponde ba ema ne’ebé presiza ran.
“Ran ne’ebé ami kolleta sei halo screening test, hafoin ida-ne’e mak bele fó ba moras sira, maibé se entaun labele entaun ami la fó,” Xefe Departamentu esplika.
Daudaun, Banco de Sangue foin simu konvite hosi Telemor hodi realiza doasaun, liga ho komemorasaun 28 novembru tinan ne’e.
Jornalista : Antónia Gusmão
Editora : Julia Chatarina
