iklan

JUSTISA

Kazu Droga, TR kontinua mantein desizaun TDD

Kazu Droga, TR kontinua mantein desizaun TDD

Imajen google

DILI, 21 novembru 2022 (TATOLI)— Prokuradór Rogeiro Viegas hateten,  nu’udar Prokuradór Titulár ne’ebé atende  kazu droga simu  ona notifikasaun hosi Tribunál Rekursu (TR)  kona-ba arguidu  FA ne’ebé mós envolve iha kazu ilísitu ba droga. Iha desijaun ne’e TR kontinua mantein desizaun Tribunál Distritál Dili (TDD).

“Ha’u simu notifikasaun hosi Tribunál Rekursu no notifikasaun ne’ebé ha’u simu ne’e, rekursu hosi argudu FA nian ne’ebé antes ne’e Trib TDD aplika medida koasaun Prizaun Preventiva,” Prokuradór Rogeiro dehan ba TATOLI via telefone segunda ohin.

Nia dehan, notifikasaun ne’e nia rasik  simu ona iha kinta (17/11) semana kotuk.

“Notifikasaun ne’ebé ha’u simu ne’e la’os rekursu hosi arguidu nain sia (9)  nian. Tanba sira nain sia nia rekursu seidauk iha desizaun. Maibé  notifikasaun ida ne’e liga ho rekursu  ne’ebé mai hosi arguidu FA nian,” afirma Prokuradór Rogeiro Viegas.

Notisia relevante : Laiha faktu sufisiente, TDD aplika TIR ba arguidu nain-sia ba kazu ilísitu droga

Tuir Rogeiro katak, iha notifikasaun nia parte simu  desizaun Tribunál Rekursu indefere rekursu ne’ebé maka antes ne’e parte Defeza hosi arguidu FA nian hato’o ba Tribunál Rekursu, relasiona ho desizaun Tribunál Primeiru Instansia  ne’ebé aplika medida koasaun Prizaun Preventiva ba nia kliente. No TR mantein ho desizaun TDD nian, ne’ebé maka antes ne’e aplika medida koasaun Prizaun Preventiva ba arguidu FA.

“Tribunál Rekursu mantein desizaun  TDD nian antes ne’e, ne’ebé maka aplika medida koasaun Prizaun Preventiva ba arguidu,”  katak nia.

Hatan kona-ba notifiksaun Tribunál Rekursu nian ne’ebé mantein desizaun TDD nian antes ne’e, hodi aplika medida koasaun Prizaun Preventiva ba arguidu FA, jornalista TATOLI tenta kontaktu via telefônika  ho arguidu FA nia Defeza, Estaqui Guterres (Defensór Públiku) maibé telemovél la ativa.

Entertantu, antes ne’e, arguidu FA submete ba Interogatoriu dahuluk iha TDD, tanba envolve iha krimi ilísitu ba droga  ne’ebé iha relasaun ho arguidu na’in sia (9).

Nune’e liu hosi prosesu Interogatoriu ne’e Juiza Maria Solana, liu hosi nia desizaun aplika Prizasaun Prevetiva ba arguidu FA, tanba prosesu interogatoriu dahuluk hatudu  faktu sira ne’ebé aprezenta no  komprova katak arguidu FA envolve iha krimi ilísitu ba droga.

Jornalista: Natalino Costa

Editora   : Armandina Moniz

 

 

iklan
iklan

Leave a Reply

iklan
error: Content is protected !!