iklan

ATAÚRO, MUNISÍPIU

Feira livru hamoris kultura lee ba populasaun Ataúro

Feira livru hamoris kultura lee ba populasaun Ataúro

Prezidente Republika, José Ramos Horta, vizita stand feira livru iha festival múzika no kultura 2022 iha Ataúro ne’ebé realiza iha Ataúro hahú hosi 21-24 novembru 2022. Imajen Tatoli/Mirondolina Barros Soares.

ATAÚRO, 22 novemberu 2022 (TATOLI)—Prezidente Republika, José Ramos Horta, hateten iha festivál Ataúro 2022 ne’ebé loke feira livru ne’e ho objetivu atu hamoris kultura lee ba sidadaun hotu-hotu liu-liu populasaun munisípiu Ataúro.

Notísia Relevante: PR Horta husu Governu fó prioridade hadi’a sentru saúde-portu Ataúro

Prezidente Republika, José Ramos Horta, vizita stand feira livru iha festival múzika no kultura 2022 iha Ataúro ne’ebé realiza iha Ataúro hahú hosi 21-24 novembru 2022. Imajen Tatoli/Mirondolina Barros Soares.

“Parte programa festivál muzika no kultura 2022 iha Ataúro, iha mós feira livru hanesan estudante Direitu UNTL sira halo inisiativa ida, nune’e bele kria kultura lee nian ba populasaun Ataúro. Tanba, iha Timor liu-liu joven no labarik sira, mezmu ema boot sira la lee, rai barak iha mundu mós nune’e nasaun barak la lee. Ne’eduni sira-nia inisiativa ne’e primeiravés ha’u rona di’ak,” Prezidente Repúblika hateten ba jornalista sira iha suku Manumeta, tersa ne’e.

Iha feira livru ne’ebe iha atividade barak mai hosi eskola Portugéza, Xanana Reading Room, Fundasaun Alola, g7+, Gabinete Fronteira Marítima, Care Internasionál, Plan Internasionál, Abut, UNDP no seluk tán.

“Tinan ida-ne’e nia laran ne’e, ha’u haree feira livru balun, ida-ne’e ha’u hanoin di’ak. Ha’u labele hateten di’akliu tanba la kuiñese hotu-hotu, ida-ne’e di’ak tebes. Ita haree artista sira, pintór sira mós partisipa, halo sira-nia traballu,” nia dehan.

Prezidente Horta hato’o agradesimentu ba Kordenadór Feira Livru, Maria Dulce de Jesus, ne’ebe prepara ona feira livru iha festival múzika no kultura 2022 iha munisípiu Ataúro.

Aleinde ne’e, reprezentante hosi grupu Abut, Carmaneza Joanico Fernandes, hateten hosi sira-nia grupo ne’e aliened prepara livru iha feira livru, sira-nia atividade seluk mak hala’o jogu no brinkeiru ba labarik sira durante feira loron haat ne’e nia laran.

“Feira livru ne’e di’ak tebes tanba atividade barak ne’ebe relasiona ho livru hanesan atividade lee livru, drama, konta istória, iha mós faan livru. Nu’udar membru abut, iha ne’e ami mós prepara livru atu konta istória ba labarik sira,” nia hateten.

Iha atividade konta istória, nia dehan, labarik sira interrese tebes atu rona istoria ne’ebé sira lee iha livru sira-ne’e hatudu katak labarik sira iha Ataúro mós gosta lee livru.

“Hosi ne’e, ita bele nota katak labarik sira gosta liu atu lee, gosta livru tanba ne’e atu dehan katak feira livru ne’e di’ak tebes. Bele karik, feira ne’e halo hela de’it mak di’ak atu nune’e bele hatoman labarik sira atu lee,” nia dehan.

Jornalista : Mirandolina Barros Soares

Editór        : Cancio Ximenes

iklan
iklan

Leave a Reply

iklan
error: Content is protected !!