DILI, 22 novembru 2022 (TATOLI)–Ministériu Edukasaun Juventude no Desportu (MEJD) distribui ona sertifikadu reforma ba profesór 800 ho idade 60 ba leten.
Diretór Jerál Administrasaun no Jestaun Finansa MEJD, Antoninho Pires, hateten, iha profesór balun hakarak kontinua sai profesór voluntáriu tanba sei iha kondisaun saúde no mentál di’ak atu hanorin iha eskola sira.
“Ha’u laiha dadus korretu profesór idade reforma ne’ebé kontinua sai voluntáriu, maibé informasaun ne’e loos, ha’u sujere ita-boot sira bele konfirma ho Diresaun Nasional Rekursu umanu atubele hetan informasaun detallu,” Diretór informa iha ninia knaar fatin, MEJD, Vila Verde, tersa ne’e.
Notísia relevante: Profesór idade reformadu 2.060 sei kontinua serbisu
Tuir Dirijente ne’e, maioria professor ne’ebé sei hakarak voluntáriu ho hanoin hakarak ezerse obrigasaun nu’udar manorin no sira tama kategoria produtivu hela.
Maski MEJD atribui ona sertifikadu ba profesór sira, maibé kontinua rejista tan dadus professor ho idade avansadu hamutuk 2.900 resin, ne’ebé hein hela rekerimentu atu hakat ba vida reforma.
“Ita-nia lei seidauk obriga, entaun profesór sira ne’e barak maka sei hein hela sira-nia rekerimentu,” nia tenik.
Jornalista : Tomé Amado
Editora : Julia Chatarina
