iklan

NASIONÁL, POLÍTIKA

Subsídiu $200: Administradór Vera Crúz submete ona dadus 9.721 ba MAE

Subsídiu $200: Administradór Vera Crúz submete ona dadus 9.721 ba MAE

Osan Dolar Amérika. Imajen/Espesiál

DILI, 29 novembru 2022 (TATOLI)—Administradór postu administrativu Vera Crúz, munisípiu Dili, Manuel Gusmão, informa nia parte submete ona dadus benefisiáriu subsídiu fim do ano $200 ba uma kain hamutuk 9.721 ba Ministériu Administrasaun Estatál (MAE).

Benefisiáriu uma kain 9.721 ne’ebé sei simu subsídiu $200 ne’e kompostu hosi suku Dare ho totál uma kain 805, Maskarinhas 1.311, Motael 1407, Caicoli 1.161, Lahane Osidentál 1.447, Colmera 422 no Vila Verde 3.168.

“Ami submete ona dadus uma kain ne’ebé sai benefisiáriu ba subsídiu fim do ano $200 ba uma kain hamutuk 9.721 ba Ministériu Administrasaun Estatál,” Manuel Gusmão hateten ba Agência Tatoli iha nia kna’ar fatin, Dili, segunda ne’e.

Tuir nia, dadus ne’ebé nia parte submete ba Ministériu Administrasaun Estatál mai hosi Autoridade Lokál liuhosi xefe suku iha kada suku.

“Lista ne’e, mai hosi xefe suku sira tanba lista xefe suku sira hatama diretamente ba iha Dirasaun Nasionál Administrasaun Suku (DNAS), hosi ne’e DNAS mós haruka fali mai. Entaun, lista ne’ebé agora haruka mai ne’e, naran lista reklamasaun ita distribui ba suku sira atu taka iha sede suku, nune’e ema ruma naran laiha ka kartaun eleitorál sala karik sira tenke halo fali reklamasaun lalais antes pagamentu. Ida-ne’e, iha fulan kotuk ita distribui ona ba suku sira,” Gusmão hateten.

Kona-ba submisaun dadus ba nasionál, nia dehan, nia parte submete ona dadus ba iha nasionál iha fulan neen (6) liubá no dadus kompletu benefisiáriu sira atu bele simu subsídiu refere.

“Ha’u hanoin, dadus ne’ebé ita submete ne’e dadús ne’ebé kompletu maibé kuandu iha fallansu ruma ne’e problema hosi Ministériu ninian, tanba dadus ita haruka kompletu ba tanba sira mak halo sinkronizasaun ba dadus, depois kuandu buat ruma sira tenke resposabiliza kona-ba dadus sira hanesan ne’e,” Administradór ne’e hateten.

Jornalista : Nelia Fernandes

Editór     : Cancio Ximenes

 

iklan
iklan

Leave a Reply

iklan
error: Content is protected !!