Top

Gaspar: “Governu laiha seriedade implementa PAN-konvensaun direitu ba EhD”

Ema ho defisiénsia (EhD) sira bainhira partisipa iha workshop kona-bá sensibilizasaun Planu Nasionál ba Ema ho Defisiénsia ba Setór Edukasaun 2020-2024, iha salaun Infordepe, Balide, Dili, 01 Outubru 2020. Imajen António Gonçalves.

DILI, 02 dezembru 2022 (TATOLI)—Asesór Prinsipál ba Asuntu Inkluzaun Sosiál, Gaspar Afonsu,, konsidera Governu laiha seriedade atu implementa planu asaun nasionál no konvensaun direitu ba ema ho desiénsia iha Timor-Leste.

“Ha’u atu dehan, ita tinan-tinan sempre selebra loron mundiál ba Ema ho Defisiénsia (EhD), ita konvida dala ruma ita-nia na’i-ulun sira partisipa mai fó diskursu no seluk, maibé triste ida ba ita mak sira laihaa sseriedade hodi implementa legalizasaun sira sira-ne’ebé ita-nia na’i-ulun sira rasik aprova,” Gaspar Afonso hateten liuhosis diskursu iha ámbitu Sensisbilizasaun no Konsulta Saúde Públika ba ema ho defisiénsia, iha salaun Palásiu Prezidensiál Nicolau Lobato, Bairru Pite, sesta ne’e.

Tanba, nia dehan, iha 2019 rezolusaun ida mosu parlamentu ba asuntu ema ho defisiénsia iha pontu 13, parese foin ida mak implementa ne’e mak aprova ona konvensaun direitu ba ema ho defiénsia iha Parlamentu Nasionál iha 04 jullu no promulga hosi Prezidente Repúblika iha 12 jullu..

“It-nia planu asaun nasionál ne’ebé aprova iha Konsellu Ministru iha 06 outubru 2021, maibé ita la hatene aprova ona orsamentu 2023 kada Ministériu sira tau ona orsamentu, hodi implementa planu asaun nasionál ne’e ka lae no konvensaun rasik ne’e ka lae, ida-ne’e mak ita-nia perguntas,” nia hateten.

Nia hateten, nia prezensa iha Palásiu Prezidente Repúblika atu hato’o ba Prezidente ho fó hanoin ba orgaun soberanu sira atu tau orsamentu sensivél ba ema ho defesiénsia.

“Ha’u-nia prezente iha Palásiu ida-ne’e ho ekipa saida mak ita halo mak ita-nia kna’ar hato’o ba PR no fó hanoin ba orgaun soberania rua seluk, Parlamentu Nasionál no Ezekutivu, tanba Prezidente Repúblika la’ós ezekutadór. Saida mak ita halo, ita enkontru ona ho bankada parlamentár sira iha Parlamentu hodi tau osan sensivél ba ema ho defiénsia,” nia dehan.

Ezemplu, nia hatete, bankada PD konsege rona Ema ho Defisiénsia (EhD) nia lian no prepara proposál ida númeru 14 maibé proposál ne’e rasik la pasa ho buat sira seluk, nune’e nafatin husu bainhira loos mak Governu Timor-Leste ka Estadu ida-ne’e atu informa ba ONU hodi TL hola parte ona iha konvensaun ida-ne’e,

“Ita-nia kna’ar mak hato’o ba PR hodi haree sasán no ko’alia situasaun sira-ne’e, ita mós hetan ona kontaktu hosi embaixadór Timor nian ba Japaun hodi komunidade defisiénsia iha Japaun sei hakarak haruka ekipamentu ba ema ho defiénsia mai Timor. Maibé, ne’e bainhira, ha’u seidauk bele fó serteza ba ita-boot sira hotu katak sira iha vontade di’ak hakarak apoiu ekipamentu ba ema ho defisiénsia, parese unidade ida-ne’e sei servisu direta ho CNR atu bele ko’alia kona-ba ekipamentu ne’e,” nia hateten.

Aliende ne’e, Gaspar Afonsu mós husu ba parte Centro Nasionál Rehabilitasaun (CNR) atu habadak burokrasia ba ema ho defisiénsia sira, tanba ema atu hetan kadeira roda ida no estiker ida de’it mós susar tebe-tebes.

Nia mós hateten, nia parte la mehi atu sai Asesór Prinsipál ba Asuntu Inkluzaun Sosiál, aliende ne’e nia mós sente triste tanba governu ne’e laiha vontade atu tau orsamentu ba ema ho defisiénsia.

Aleinde ne’e, Asesór Prinsipál ne’e parabéniza ba ema ho defisiénsia sira hotu, tanba bele selebra loron mundiál ba ema ho defisiénsia sira.

“Parabéns ba ita defisiénsia sira hotu iha Timor no mundu, labele kontente ho loron ne’e sira (Governu) mai partisipa ho ita, maibé ita ezije sira oinsá sira-nia kompromisu, vontade no sira-nia seriedade atu implementa planu asaun nasionál no konvesaun direitu ba ema ho defisiensia, ida-ne’e mak ita-nia hakarak,” nia apela.

Jornalista : Nelia Fernandes

Editór       : Cancio Ximenes

Publisidade

Leave a Reply

Latest Post

error: Content is protected !!