DILI, 02 dezembru 2022 (TATOLI)–Governu liuhosi reuniaun Konsellu Ministru (KM) estraordinária, sesta ne’e, aprova projetu dekretu-lei, ne’ebé aprezenta hosi Primeiru-Ministru (PM), Taur Matan Ruak, ba kriasaun unidade misaun hodi kombate raes badak ‘stunting’ ka nanismu.
“Unidade misaun atu kombate raes badak ninia misaun mak atu halo planu nasionál atu hasoru raes badak halo ezekusaun ba medida sira ne’ebé prevee, mobiliza populasaun, liuliu ba adosaun komportamentu preventivu apoia atividade tratamentu no hamenus stunting no asegura koordenasaun hosi órgaun no servisu administrativa sira iha matéria kombate stunting no má-nutrisaun labarik,” Ministru Finansa, Rui Augusto Gomes, relata, hafoin reuniaun ezekutivu, iha Palásiu Governu.
Notísia relevante: MSSI sei introdús “bolsa da mãe jerasaun foun” faze daruak ba munisípiu haat
Unidade ida-ne’e sei halo koordenasaun ho órgaun sira seluk no servisu administrativu relevante, ne’ebé sei responsável ba elaborasaun planu asaun kombate stunting iha Timor-Leste no ba ezekusaun medida sira ne’ebé prevee.
“Haree ba natureza multidixiplinár no multisetoriál hosi asaun sira ne’ebé tenke halo, unidade ne’e sei depende ba Primeiru-Ministru. Unidade ba misaun kombate raes badak ramata iha loron 31 dezembru 2024,” governante ne’e tenik.
Jornalista : Antónia Gusmão
Editora : Julia Chatarina
