Autoridade RAEOA despede atleta Taekwondo bá partisipa eventu KAJATI iha Kupang
OÉ-CUSSE, 03 dezembru 2022 (TATOLI) –Autoridade Rejiaun Administrativa Espesiál Oé-Cusse Ambeno (RAEOA), sábadu ne’e, hala’o despedida ho atleta na’in-20, hosi Asosiasaun Taekwondo Oé-Cusse atu bá tuir kompetisaun iha eventu Kepala Kejaksaan Tinggi (KAJATI) Nusa Tenggara Timur (NTT), iha sidade Kupang, Repúblika Indonézia.
Seremónia despedidada ne’e realiza iha edifisíu Asosiasaun Taekwondo Oé-Cusse, ne’ebé despede hosi Sekretáriu Rejionál ba Asuntu Agrikultura, José Eta.
Iha seremonia despedida ne’e, Reprezenta Prezidente Autoridade RAEOA, José Eta, orgullu tanba istórikamente, Asosiasaun Taekwondo esiste iha Oé-Cusse kontribui ona valór prémiu ho tipu internasionál.
Nune’e, nia enkoraja ba atleta sira ne’ebé reprezenta RAEOA no Timor-Leste, presiza hatudu disipliña no onestidade nu’udar sidadaun Timoroan, no espera ho esforsu tomak bele hetan susesu iha eventu refere hodi hamorin Timor-Leste nia naran.
“Ita boot sira bá lori ita-nia bandeira RDTL hatudu imi nia-esforsu hodi defende ita-nia nasaun, presiza disipliña tanba bainhira ita halo sala, ita-nia nasaun bele naran fo’er iha nasaun seluk nia oin”, nia afirma.
Iha fatin hanesan, Prezidente sub-Komisaun Reguladóra Arte Marsiál (RAEOA) iha RAEOA, Jeferino da Cruz Salu, agradese ba inan-aman sira tanba bele autoriza oan-sira atu reprezenta Timor-Leste liuliu Oé-Cusse hodi kompete iha eventu internasionál ne’e.
“Ha’u fiar oan sira sei fila mai ho saúde di’ak no lori mensajen furak ba povo Timor-Leste liuliu Oé-Cusse”, nia katak.
Entretantu, Reprezentante Koordenadór Asosiasaun Taekwondo RAEOA no Treinadór, José Fransisco Efi, agradese ba Autoridade RAEOA tanba bele apoia no suporta Asosiasaun Taekwondo RAEOA nian bá partisipa eventu internasionál ne’e.
“Ami agradese ba Autoridade RAEOA tanba ajuda ami hodi haruka ita-nia joven sira bá compete no hatudu sira-nia talentu desportiva liuhosi eventu sira no mós promove bebeik ona iha nasaun viziñu sira, ida-ne’e orgullu mai ami, no atleta na’in-20 ne’ebé Asosiasaun hili liuhosi ezame no selesaun”, agradese.
Iha biban ne’e, Treinadór ne’e relata ba inan-aman no Autoridade RAEOA kona-ba prestasaun no kontribuisuan hosi ateleta sira ba Estadu Timor-Leste liu-liu iha RAEOA maka;
Iha 2019 Asosiasaun Taekwondo reprezeta RAEOA partisipa iha eventu internasionál realiza iha Timor Osidentál Atambua, Taekwondo Oé-Cusse konsege hetan rezultadu di’ak no kontribui ba Estadu maka, medalla osan mean tolu (3), medalla osa mutin hitu (7) no osan metan lima (5).
Iha 2020 reprezenta Taekwondo RAEOA patisipa eventu nasionál realiza iha munisipíu, Taekwondo RAEOA hetan rezultadu di’ak, no konsege kontribui medalla tolu ba RAEOA mak, liuhosi primeiru lugar na’in-ida (1), segundu lugar na’in-ida (1) no terseiru lugar na’in-rua (2).
Iha 2021 Taekwondo RAEOA, kompetisaun barak, maibé tansa situasaun COVID-19, nune’e realiza liuhosi virtuál de’it. Nune’e partisipa eventu iha Golotariu Indonézia, Taekwondo RAEOA konsege kontribui osan mutin rua (2) no metan ida (1) ba RAEOA.
Iha 2022 kompetisaun ho klase internasionál iha Estadu Unidu Amérika, Asosiasaun Taekwondo RAEOA hetan rezultadu di’ak no konsege konstribui medalla osan mean ida (1) no medalla osan metan tolu (3).
Entretantu, kalendáriu atu dezloka ba NTT iha distritu Kupang sei akontese iha domingu 4 dezembru 2022, ne’ebé lidera lidera hosi treinadór sira no Koordenadór Asosiasaun Taekwondo RAEOA nian.
Jornalista : Abílio Elo Nini
Editór : Florencio Miranda Ximenes
