Top

Loron daruak, atleta Taekwondo RAEOA na’in-neen kompete iha eventu KAJATI

Atleta Taekwondo hosi RAEOA partisipa iha eventu KAJATI, iha salaun desportu Kupang, sábadu (10/12). Imajen Tatoli/Abílio Elo Nini

KUPANG, 10 dezembru 2022 (TATOLI)–Atleta Taekwondo na’in-neen hosi Rejiaun Administrativa Espesiál Oé-cusse Ambeno (RAEOA), sábadu ne’e, hahú kompete iha abertura torneiu Kepala Kejaksaan Tinggi (KAJATI) 2022, ba matéria Kyorugi no Poomsae iha salaun desportu sidade Kupang, provínsia Nusa Tenggara Timur (NTT), Repúblika Indonézia.

Molok hahú kompetisaun, Jerente Asosiasaun Taekwondo hosi RAEOA, Jacob Efi, informa, eventu KAJATI ne’ebé tama ba loron daruak, iha atleta na’in-neen mak kompete no iha loron dahuluk atleta na’in-rua kompete ona ho rezultadu finál ukupa fatin datoluk.

“Rezultadu finál atu manan ka lakon ita sei rona iha orsida kalan, tanba kompetisaun ne’e sei kontinua la’o tuir klase ida-idak. Entaun ohin ita-nia atleta na’in-neen kompete no iha domingu iha balun mak sei kompete tan tanba antes ne’e ita prepara atleta 20 atu mai kompete iha eventu ne’e,” Jacob Efi, hateten ba Agência Tatoli, iha salaun desportu Kupang.

Notísia relevante: Atleta Taekwondo feto rua hosi RAEOA kompete iha loron dahuluk hasoru NTT

Iha dahuluk, sesta, (09/12) atleta feto rua hosi RAEOA mak kompete ona ho rezultadu finál okupa terseiru lugar, nune’e tama ba loron daruak, sábadu (10/12) atleta na’in-neen hahú kompete ho kategoria pra-kadet, kadet no juniór.

Atleta na’in-neen ne’e mak hanesan, Indira Hei, ho todan kilograma 44 ba klase juniór feto hosi RAEOA hasoru Preti atleta Taekwondo, no Alvaro Alvares ho todan kilograma 33 iha klase kadet hasoru Lazio hosi KONI Dili.

Nune’e mós, Gradiana da Costa, ho kilograma 37 iha klase kadet hosi RAEOA hasoru Cheisya Giandra Amaral atleta Taekwondo hosi  ATC NTT, no mós Adelaide Catarina Colo hosi RAEOA iha klase kadet ho todan kilograma 33, hasoru atleta Aurelia Miriam Banu hosi Timur Tenggah Selatan.

Tuir mai, atleta Lorenço Binsasi hosi RAEOA ho todan kilograma 28 iha klase pra-kadet hasoru Mario Nong Kristian atleta hosi Timur Tenggah Selatan, no mós atleta  Jacinta Ote hosi RAEOA ho nia todan kilograma 32 iha klase pra-kadet hasoru Anabela Tharamata atleta taekwondo hosi PPO Kupang.

Abertura torneiu KAJATI realiza durante loron tolu, hahú sesta (09/12) to’o domingu (11/12), iha salaun desportu Kupang, ho totál atleta na’in-845 hosi dozan 32, kompostu hosi mane 495 no feto 317 (inklui Timor-Leste).

Kategoria eventu hosi pra-kadet A ba idade neen to’o hitu, pra-kadet B ba idade ualu to’o sia, pra-kadet C ba idade 10 to’o 11, pra-kadet D ba idade 12 to’o 14, nune’e mós seniór no juniór.

Jornalista   : Abílio Elo Nini

Editora        : Julia Chatarina

Publisidade

Leave a Reply

Latest Post

error: Content is protected !!