Xefe suku Manutasi husu Governu atu kria kondisaun ba manorin sira

DILI, 12 dezembru 2022 (TATOLI)—Xefe suku Manutasi, postu administrativu Ainaro, munisípiu Ainaro, Manuela Caldas, husu Governu atu kria kondisaun ba manorin sira tanba sira hela distánsia dook hodi prejudika prosesu aprendizajen ba estudante sira.
“Ami husu Governu bele kria kondisaun ba profesór sira-ne’ebé hela dook hosi eskola. Se mane sei di’ak, feto ne’e razaun bara-barak tanba ami feto iha difikuldade oioin, Ne’ duni husu Governu fasilita transporte ba sira,” Xefe suku Manutasi ne’e hateten ba Agência Tatoli, hafoin partisipa sorumutu nasionál buka dalan alternativu ba dezafiu sira liu-liu setór agrukultura, saúde, edukasaun, bee moos iha ámbitu komemorasaun loron direitu umanu ba dala 75 iha salaun Luz Clarita, Dili.
Tanba, nia esplika, eduksaun mak xave importante ba futuru labarik no joven sira, nune’e presiza tau atensaun ba manorin sira hodi nune’e bele hala’o atividade aprendizajen ho di’ak.
Entretantu, xefe suku Buruma, postu administrativu Baucau Vila, Liborio Freitas, preokupa mós ba sala aprendizajen ba estudante sira-ne’ebé mak sei menus no la sufisiente.
“Ita nia oan sira balun sei tur iha rai halo aprendizajen. Iha suku Buruma iha loos sidade hun mós ita-nia oan sira pre-eskolar ne’e sei tur iha rai mak hakerek,” nia informa.
Tanba, nia haktuir, bainhira labarik sira fila ba uma haruka tuur iha kadeira mak hakerek, sira dehan profesór nunka hanorin sira tuur iha kadeira maibé tenke toba mak hakerek, tanba ne’e mak hanoin asuntu edukasaun ne’e importante tebes-tebes ne’ebé problema hirak ne’e to’o ohin loron seidauk rezolve.
Xefe suku Iriheu, postu administrativu Ermera Vila, munisípiu Ermera, Felisberto Ximenes, hateten edukasaun iha munisípiu Ermera ne’e kondisaun infraestrutura iha eskola kuaze 10 de’it mak iha kondisaun di’ak no sira seluk aat hela.
“Setór edukasaun ami rasik, haree infraestrutura sei minimu. Kuaze 50% infraestrutura ita bele dehan 10-resin mak kondisaun di’ak maibé ita mós atu hadi’a merenda eskolár,” nia hateten.
Jornalista : Osoria Marques
Editór : Cancio Ximenes

