iklan

NASIONÁL, POLÍTIKA

CNE halo avaliasaun anuál ba atividade servisu-eleisaun Prezidensiál 2022

CNE halo avaliasaun anuál ba atividade servisu-eleisaun Prezidensiál 2022

Prezidente Komisaun Nasionál Eleisaun (CNE, sigla portugés), José Agostinho da Costa Belo. Imajen Tatoli/Francisco Sony.

DILI, 15 dezembru 2022 (TATOLI)—Komisaun Nasionál Eleisaun (CNE, sigla portugés) halibur hamutuk ho diretór CNE munisipál, kinta ne’e, halo avaliasaun ba atividade servisu hotu-hotu iha 2022 liu-liu halo avaliasaun ba eleisaun prezidensiál.

“Tanba ne’e, reflesaun ohin no aban ne’e tenke mai hosi fuan labele naran halo de’it, nune’e ita halo avaliasaun ba ita-nia situasaun ne’ebé ita halo iha tempu eleisaun liubá. Aleinde ne’e, ita konsolida ita-nia forsa hodi prepara ba eleisaun parlamentar tinan oin,” Prezdiente Komisaun Nasionál Eleisaun (CNE, sigla portugés), José Agostinho da Costa Belo, hateten ba jornalsita sira hafoin halo abertura ba avaliasaun anuál 2022, iha salaun CNE Laline Larigutu.

Tanba ne’e mak CNE iha munisípiu 13 inklui Rejiaun Administrativa Espesiál Oé-Cusse mós partisipa hodi oinsá sira bele rejistu kestaun sira fundamentál iha prosesu eleisaun prezidensiál liuba ne’e.

“Ida-ne’e presiza hato’o iha nasionál, nune’e hamutuk ho komisáriu sira hodi haree, nune’e presiza kurije saida mak presiza hadi’a. Ida-ne’ebé di’ak aumenta liután, nune’e oinsá mak eleisaun tuir mai ne’e bele susesu,” nia dehan.

Tanba, tuir nia, karáteristika eleisaun parlamentár ho eleisaun Prezidensiál ne’e la hanesan inklui kampañia tanba agora kandidatu maihosi konkorente partidu nian no kampaña eleisaun parlamentár ne’e durante loron 30.

“Ho hirak-ne’e hotu mak Prezidente Repúblika, José Ramos Horta, husu ba CNE atu servisu makaas hodi servi ba partidu hotu-hot. Nune’e, ami CNE la haree ba partidu boot ka kiik no iha tinan 2023, partidu hotu-hotu sei avansa ho zero depois konkista duni ita-nia komunidade nune’e bele hetan partisipasaun ne’ebé di’ak iha eleisaun,” nia hateten.

Iha eleisaun parlamentár tinan oin ne’e, labele diskrimina partidu ida tanba partidu hanesan patrimóniu Timor-Leste nian ne’ebé eziste no tanba demokrasia ne’e mak tenke iha partidu polítika.

“Nune’e, iha loron rua halo avalisaun anuál ba 2022 ne’ebé durante CNE halo ona atividade sira maibé presiza mellora di’ak liután. Ho ida-ne’e presiza halo reflesaun ba ita-nia an tanba atu susesu ne’e, xave importante mak ema no ema mak sai sentru, mezmu sistema di’ak, teknolojia mudansa, inovativu iha prosesu tomak maibé hotu-hotu ne’e nia sentru mak ema,” nia hateten.

Diretór CNE Munisipál Viqueque, Honório Crus da Silva, hateten evaluasaun ohin ne’e importante tebes atu halo, nune’e bele reflete fali asaun no atividade hotu-hotu ne’ebé CNE hala’o iha tinan 2022 liu-liu eleisaun Prezidensiál liubá.

“Evaluasaun ohin ne’e importante tanba asaun no planu ne’ebé ita halo 2022 liu-liu eleisaun Prezidensiál, atu nune’e ita haree frakeza sira-ne’ebé ita hodi hadi’a fali nune’e halo melloramentu ba planu no servisu ne’ebé ita sei halo eleisaun parlamentár iha 2023,” nia hateten.

Jornalista : Osoria Marques

Editór       : Cancio Ximenes

iklan
iklan

Leave a Reply

iklan
error: Content is protected !!