Ekipa rejistu movél rejista ona labarik no EhD hamutuk 33.282

DILI, 19 dezembru 2022 (TATOLI)—Ekipa rejistu movél rejista ona labarik no Ema ho Defisiénsia (EhD) hamutuk 33.282 iha munisípiu neen (6) hanesan Bobonaro, Covalima, Ermera, Lautém, Manufahi no RAEOA.
“Durante ne’e, ekipa rejistu movél rejista ona labarik no ema jp defisíensia sira hamutuk 33.282 iha munisípiu lima maibé la inklui Rejiaun Administrativa Espesiál Oé-Cusse Ambeno (RAEOA),” Delegadu Adjuntu iha UNICEF, Ainhoa Jaureguibeitia, hateten iha komunikadu imprensa ne’ebé Agência Tatoli asesu, segunda ne’e.
Projetu rejistu móvel ne’e hala’o ona durante tinan ida hahú hosi fulan-setembru 2020 to’o dezembru 2022 ne’ebé mak hala’o iha suku hamutuk 114 no aldeia 490.
Rejistu ne’e hala’o ho objetivu atu garante identidade ba rejistrasaun no sertidaun moris labarik sira iha área rurál ho idade 0-5 no ema ho defisiénsia sira-ne’ebé susar atu asesu ba sentru rejistu sivil munisipál.
“Ha’u haksolok haree timoroan barak iha oportunidade hodi hetan sertidaun moris nian tamba labarik hotu inklui ema defisiénsia sira hotu, iha direitu atu hetan sira-nia identidade,” nia dehan.
Programa rejistu móvel ne’e nia mekanizmu atu rejista no sertifika direita benefisiáriu sira iha fatin atendimentu rejistu nian iha nivel postu administrativu.
ChildFund Timor-Leste no Ministériu Justisa ne’ebé sai hanesan implementadór ba projetu ida-ne’e haksolok tanba iha kordenasaun no parseria di’ak hamutuk ho Ministériu Administrasaun Estatál liuhosi Diresaun Nasionál Apoiu Administrativu Suku (DNAAS).
“Ami kontente tanba projetu ida-ne’e la’o ho di’ak tanba apoiu másimu husi ChildFund no UNICEF no espera projetu ida-ne’e bele kontinua fo apoiu ba munisípiu sira-ne’ebé seidauk hetan oportunidade ida-ne’e,” Diretór Nasional Rejistu no Notariadu, João Martins Borges, dehan.
Rejistu moris ne’e atu tulun benfisiáriu sira hetan sertidaun moris nu’udar dokumentu primeiru hodi garante sira-nia identidade no nasionalidade no bele asesu ba servisu sosiál sira seluk hanesan edukasaun, saúd , subsídiu familiar no seluk tan .
UNICEF ho ChildFund mós halo ona asesmentu ba eskritóriu rejistu sivil iha munisípiu 13 bazea ba rezultadu avaliasaun ne’e, sosa ona ekipamentu elektróniku no mobíliáriu sira ba kada eskritóriu.
Ohin loron, sasán hirak ne’e entrega ona iha eskritóriu Rejistu Oé-Cusse no munisipiu sira seluk sei hetan ekipamentu hirak ne’e iha tempu badak nia laran.
Projetu ida-ne’e hetan fundu mai hosi Governu Japaun ne’ebé distribui liuhosi UNICEF ho montante $150,000 no projetu ne’e implementa hosi ChildFund no MJ.
Rejistu movél ensera ona no hetan partisipa Ministériu Justisa (MJ) hamutuk ho UNICEF ba projetu rejistu movél iha Rejiaun Administrativa Espesiál Oé-Cusse Ambeno (RAEOA).
Jornalista : Osoria Marques
Editór : Cancio Ximenes

