DILI, 22 dezembru 2022 (TATOLI)—Asosiasaun Defeza Konsumidór Timor-Leste, TANE Konsumidór, kuarta ne’e, lansa rezultadu peskiza ba folin produtu sira hosi loja hamutuk 21 iha kapitál Dili.
Prezidente TANE Konsumidór, António Ramos da Silva ‘Naikoli’, hateten, ekipa hosi asosiasaun foti folin produtu ai-han hamutuk 21, ne’ebé fa’an iha loja 21 iha Dili, ho ninia konklusaun hatudu katak produtu baratu liu ho folin $47,05 no karun ho folin $79,55, ho ninia variasaun 69%.
“Objetivu hosi peskiza ne’e mak ajuda konsumidór sira asesu informasaun produtu ne’ebé fa’an iha loja sira no ajuda konsumidór sira ba hola produtu ruma karik tenke haree nia folin ne’ebé taka iha sasán refere, nune’e bainhira ba iha kasir folin bele hanesan no ajuda konsumidór hatene literasia finanseira, katak ho osan naton bele ba sosa produtu barak,” Prezidente TANE Konsumidór, relata iha nia rezidénsia Vila-Verde.
Notísia relevante: TANE Konsumidór introdús peskiza folin nesesidade bázika iha loja 21
Loja 21 ne’ebé ekipa TANE hala’o peskiza ba folin ai-han mak hanesan Grasia Shop, W-Four, Dilimart, Jacinto, Lita Store, Leader,Centro Supermercado, no seluk tan.
Nia dehan, atu tama ba festa natál, TANE konsidera urjente providénsia asesu ba ai-han sira ho folin aseitável ba família timor-oan hotu.
Nune’e, asosiasaun ninia ekipa verifika folin produtu ne’ebé mak baratu liu, la haree ba ninia marka orijin iha loja hamutuk 21 iha Dili laran iha postu administrativu tolu hanesan Dom Aleixo, Na’in-Feto no Vera Cruz.
“Ita-nia peskiza ne’e hatudu katak supermerkadu ne’ebé oferese kabaz natál baratu liu mak hanesan Grasia Shop (Comoro) ho osan $47,05 no loja ne’ebé fa’an ho folin karun mak Seara (Central) hamutuk $79,55,” nia informa.
Hosi diferensa folin kabaz ne’ebé karun no baratu, konsumidór sira halo literasia hodi bele halo poupansa osan $32,50.
Variasaun ba folin hosi loja ida ba loja seluk, destaka produtu tolu ninia folin ne’ebé a’as liu dala-rua hanesan ai-fuan apel 1kg ho ninia folin $1 iha loja Seara (Pantai Kelapa), loja Meimart (Comoro), Centro Fresco (Bidau), Meimart (Audian) produtu hanesan maibé folin la hanesan $4,50.
Na’an fahi 1kg ho folin $4,50 hetan iha Dilimart (Bidau Licidere), Seara (Pantai Kelapa) no Dilimart (Bidau Akadiruhun), maibé ba iha loja Meimart (Fatuhada) no Meimart (Audian) ho folin $10,75.
Tomate 1kg ho folin $1,10 iha Seara (Central) no Centro Supermercado ho folin $2,75, enkuantu folin foos entre fulan-agostu ho kabaz natál diferente hanesan foos 25kg ho folin hanesan, uluk loja sira fa’an folin baratu liu $13,50 no karun liu $16,25 maibé agora iha ámbitu natál nianfoos 25kg ho folin baratu $12 no karun liu $14,50.
“Ida-ne’e hatudu katak daudaun folin produtu sira ne’e iha mudansa, tanba ne’e bainhira konsumidór atu poupa, depende ba kompra ne’ebé sei hala’o, tanba ne’e konsumidór sira tenke haree didi’ak ba folin kabaz hotu no folin kada produtu hotu, hodi halo planu didi’ak molok ba sosa,” nia dehan.
Jornalista : Arminda Fonseca
Editora : Julia Chatarina
