TLPU husu PCIC labele inkeritu individu ba obra publikasaun ida

DILI, 23 dezembru 2022 (TATOLI)–Sekretáriu Jerál Timor-Leste Press Union (TLPU), Zezito Silva, dehan TLPU husu Polísia Sientifika Investigasun Kriminál (PCIC) halo inkeritu ba ema ne’ebé loos no labele lori individuál depois mak hodi inkeritu fali ba obra publikasaun ida.
Notisia Relevante: TLPU ezije komandu PNTL anula karta notifikasaun ba Independente
“Liga ho obra publikasaun hosi Jornál Independente, ne’e ami hanoin katak autoridade Polísia sira halo investigasun ba ema ne’ebé la loos, la merese atu fó informasaun ba ida-ne’e. Tanba ne’e TLPU husu ba PCIC atu halo inkeritu ba ema ne’ebé loos labele lori individual depois mak inkeritu fali obra publikasaun,” nia dehan ba jornalista sira, iha PCIC Colmera, sesta ne’e.
Tanba ne’e, nia husu jornalista sira atu apoiu nafatin prosesu ida-ne’e hotu atu nafatin defende liberdade imprensa no liberdade espresaun iha Estadu demokrátiku ida-ne’e.
Diretór Jornal Independente, José Sarito, hateten bainhira halo inkeritu liga ho obra jornalístiku ne’e resposabilidade instituisaun nian la’ós individuál.
“Ha’u hateten fila-fila karta ne’e tama sala nafatin, tanba depois haruka karta ne’e ba ami hodi prefere ba individuál maibé iha inkeritu mak husu fali obra jornalístiku, ne’e responsabilidade instituisaun nian. Entaun sira privatiza tiha kazu instituisaun ne’e mai individu, nune’e hafasil tiha sira bele halo inkeritu ha’u-nia jornalista. Ida-ne’e manobra ida atu hamate liberdade imprensa. Iha artigu 19 katak ami sei la ko’alia sai buat ne’ebé ami la hatane no ami hein de’it iha tribunal,” Diretór Independente haktuir.
Iha artigu 34 hateten, karik notísia ruma sala ka iha erru ne’ebé fó insatisfeitu ba públiku ne’e iha lei hateten momoos katak sira iha direitu atu fo direiru resposta no halo retifikasaun.
“Tanba ne’e inkeritu tuir mai ami sei la autoriza no sei la mai tan inkeritu no ita hein malu iha tribunal. Ami sei la mai tan iha PCIC tanba sira liga kazu ne’ebé ba obra jornalístiku nian,” nia dehan.
Maibé loloos kazu ne’e la boot ida tanba iha lei komunikasaun sosiál ne’ebé regula atividade mídia jornalista sira ne’e iha maibé tanbasá la uza ida-ne’e hodi halo direitu de resposta no halo retifikasaun ba publikasaun ne’e.
Jornalista Independente, Domingos Gomes, hateten sira husu klareza hosi fontes ne’ebé fó informasaun maibé ida-ne’e segredu no sei deklara iha fatin ida-ne’e, se bainhira kazu ne’e ba oin.
Nia dehan, pergunta ne’ebé Polísia Servisu Investigasaun Seintifika husu ne’e liga ho produsaun notísia ne’ebé públika iha jornal Independene.
“Tanba tuir karta ne’ebé haruka ba ami ne’e dehan katak bolu pesoál maibé mais to’o iha PCIC halo inkeritu fali liga obra ne’ebé ha’u halo iha jornál independente ne’ebá. Ho ida-ne’e prontu ba oin,” nia dehan.
Vise Prezidente Asosiasaun Jornalista Timor-Leste (AJTL), Constâncio Vieira, hatutan kazu ida ohin PCIC halo inkeritu ba jornalista Independente ne’e kazu anteriór nian, kazu ne’e hosi Ministériu Interiór no Polísia Nasionál Timor-Leste (PNTL) nian, nune’e hosi kazu ne’e atu sé mak sente hakanek entaun halo karta diretamente ba redasaun atu nune’e redasaun deside halo direitu resposta ka halo retifikasaun ba notísia.
Notisia Relevante: Komandu PNTL klarifika karta notifikasaun ba Jornal Diáriu INDEPENDENTE
Jornalista : Osoria Marques
Editór : Cancio Ximenes

