AMD koordena ho PNTL muda negosiante faan karreta iha espasu públiku

DILI, 28 dezembru 2022 (TATOLI)—Diretór Servisu Munisipál Jestaun Merkadu no Turizmu, Arthur Henriques, informa Autoridade Munisípiu Díli (AMD) liuhosi Departamentu Jestaun no Merkadu sei kontinua koordena ho Polísia Nasionál Timor-Leste (PNTL) atu muda negosiante faan karreta no motor iha espasu públiku.
Notísia Relevante: AMD hasai ona negosiante faan karreta iha kaza Europeia oin
“Serbisu ba kontrola karreta ne’ebé faan iha trotoar leten, tuir lolos ida-ne’e kompeténsia ba Polísia Tranzitu sira-nia, tanba sira-nia kompeténsia. Karik sira haree konsentrasaun karreta no motor faan iha trotoar leten, tuir lolos sira mak haree. Maibé la taka dalan ba ami, tanba ami mós sempre ba koordena ho sira liu-liu ba dirasaun tranzitu bele haree ba asuntu ne’e. Tanba, ami muda ona sira maibé sira kontinua to’o agora. Entaun, ho informasaun ida-ne’e ami mós bele tau iha konsiderasaun no sei hato’o ba xefe departamentu atu ho ekipa ida, kontinua koordena ho Polísia Tranzitu atu ba haree situasaun ne’e,” Arthur Henriques hateten ba Agênsia Tatoli iha nia kna’ar fatin, kuarta ne’e.
Tuir nia, negosiante sira-ne’ebé sei kontinua faan iha trotoar leten ne’e laiha konxiénsia, tanba Autoridade Munisípiu Dili fó hatene ona informasaun labele faan iha trotoar leten maibé negosiante sira sei kontinua faan.
“Mentalidade ita-nia populasaun nian, mentalidade ida ne’e mak halo ita-nia ulun moras, mesmu ita fó ona orientasaun atu sira kumpre maibé sira kontinua no dala ruma tanba ita seidauk aplika sansaun ba sira. Maibé, tuir lolos polísia tranzitu kuandu preende sira-ne’ebé viola regra ne’e fó multa, atu nune’e sira labele para no faan iha espasu públiku. Sé mak aplika multa ne’e polísia tranzitu la’os ami,” nia esplika.
Negosiante sira-ne’ebé faan karreta no motor iha espasu públiku, Munisípiu Dili labele aplika sansaun tanba ida-ne’e la’ós Autoridade Munisípiu Dili nia kompeténsia.
“Ami labele aplika tanba ne’e la’ós kompeténsia ami-nian, tanba ami apenas fó hatene ba sira, maibé aplika sansaun, polísia tranzitu mak bele aplika,” nia dehan.
Entretantu, tuir observasaun jornalista Agência Tatoli iha terrenu nota katak negósiante sira ne’ebé agora daudaun sei faan karreta no motor iha espasu públiku, hanesan iha Kaza Europa nia oin, jardim lrago de Lecidere, Fatuhada no fatin seluk tán.
Jornalista : Nelia Fernandes
Editór : Cancio Ximenes

