STAE rejista eleitór foun iha territóriu nasionál 18.246
DILI, 28 dezembru 2022 (TATOLI)—Diretór Jerál Sektretariadu Tékniku Administrasaun Eleitorál (STAE), Acilino Manuel Branco, informa iha periódu ne’e STAE rejista eleitór foun iha territóriu nasionál hamutuk 18.246 ne’ebé kompostu hosi feto 8.492 no mane 9.754.
“Rezultadu atendementu resensiamentu eleitorál no atualizasaun baze dadus ba períodu ida-ne’e, ita konsege rejistu eleitór foun hamutuk 18.246 iha territóri nasionál,” nia dehan ba jornalista sira, iha konferénsia imprensa, salaun STAE, Dili, kuarta ne’e.
Prosesu resensiamentu eleitorál no atualizasaun baze dadus, STAE mós atualiza ema hamutuk 43.296 ne’ebé kompostu hosi mane hamutuk 24.206 no feto 19.090.
Atendimentu ba resensiementu eleitorál no atualiza baze dadus termina iha fulan-novembru nia rohan iha nível postu territóriu 66, maibé sei iha tan ezijénsia komunidade entaun STAE estende tan atendimentu ba to’o 15 dezembru 2022.
STAE sei kontinua fali RE ho ABD iha territóriu nasionál inklui diáspora iha loron 16 janeiru 2023.
“Mezmu ita seidauk halo resensiementu no atualizasaun baze dadus iha diáspora maibé ilha períodu ida-ne’e iha movimentasaun ne’ebé eleitór iha diáspora mai Timor-Leste, entaun antes eleitór ne’ebé rejistu no tuir eleisaun iha ne’ebá númeru tuun, tanba sira fila ona mai Timor no sira-nia naran rejistu iha nasionál ona. Maibé, janeiru, STAE sei halo fali abertura hodi hahú RE no ABD iha internasionál no nasionál,” nia dehan.
Númeru eleitór to’o iha fulan-dezembru 2022 hamutuk 878.712 ne’ebé kompostu hosi Aileu 34.706; Ainaro 46.945; Ataúro 2.600; Baucau 98.629; Bobonaro 72.811; Cavalima 48.830; Dili 192.934; Ermera 84.361; Lautém 49.380; Liquiça 51.925; Manatuto 35.999; Manufahi 41.574; RAEOA 53.151; Viqueque 58.867.
Entaun eleitór ne’ebé ne’ebé agora resensiadu no atualizadu iha diáspora nian hamutuk 6.944, kompostu hosi Auatrália 1.462; Korea Súl 1.237; Irlandia do Norte 2.185; Portugál 1.241 no Reinu Unidu 819.
Jornalista : Osoria Marques
Editór : Cancio Ximenes
