OÉ-CUSSE, 29 dezembru 2022 (TATOLI)-Koordenadór Institutu Nasionál Seguransa Sosiál (INSS) iha Rejiaun Administrativa Espesiál Oé-cusse Ambenu (RAEOA), Albanu de Jesus Maniquin, hatete INSS hahú ona halo pagamentu ba terseira-idade no invalidez faze daruak iha RAEOA hamutuk 7088.
Benefisiáriu sira mak invalidéz 119, ferik no katuas sira 6.969. Númeru ne’e mai hosi sub-rejiaun haat, Oésilo, Pássabe, Nítibe no Pante Makasar.
“Pagamentu hahú iha 19 dezembru to’o 9 fevereiru 2023, agora ita halo pagamentu dahuluk iha sub-rejiaun Nítibe, depois maka ba sub-rejiaun seluk, tanba agora tempu udan, ne’ebé kaléndariu ita distribui ona iha suku ida-idak atu prepara, maibé depende fali mós ba situasaun dalan”, Maniquin ba Tatoli iha Oé-Cusse, kinta ne’e.
Nia informa, iha sub-rejiaun Nítibe suku Lela-Ufe mak konklui ona no daudaun ne’e hala’o hela pagamentu iha iha suku Bene-Ufe, Usitaku depois kontinua ba suku Suni-Ufe no Ban-Afi.
“Kaléndariu ne’e sei iha mudansa tanba agora situasaun udan, iha loron 03 janeiru sei halo pagamentu iha Pássabe suku Malelat, maibé ami sei konfirma uluk xefe suku kona-bá kondisaun estrada, karik la di’ak ami sei halo fali pagamentu iha sub-rejiaun seluk,” nia afirma.
Tuir nia, durante prosesu pagamentu la’o, difikuldade ne’ebé hasoru maka dalaruma pagamentu la tuir oráriu, tanba agora ne’e tempu udan entaun benefisiáriu persiza pasiénsia hodi hein kleur iha ida-idak nia suku.
Nia esplika, durante pagamentu karik benefisiáriu balu la’o labele, tékniku sira halo akordu ofisiál ida ho xefe suku priénse deklarasaun hodi autoriza nia reprezentante bele simu sira-nia direitu pensaun sosiál ne’e.
Benefisiáriu 7088 ne’e mai hosi sub-rejiaun Nítibe ba pensaun invalidés 21, ferik no katuas 1.459, iha sub-rejiaun Oésilo ba pensaun invalidés 31 no terseira-idade 1.573. Sub-rejiaun Pante Makasar ba pensaun invalidés 64 no terseira-idade 3.183, no iha sub-rejiaun Pássabe pensaun invalidés 3, ferik no katuas hamutuk 754.
Notísia relevante: Governu hahú halo pagamentu idozu-invalidéz faze daruak iha Nítibe
Jornalista : Abílio Elo Nini
Editora : Rita Almeida
