PNTL Bobonaro garante seguransa ba selebrasaun tinan foun 2023
BOBONARO, 31 dezembru 2022 (TATOLI)—Komandante Polísia Nasionál Timor-Leste (PNTL) komando munisípiu Bobonaro, Superintendente Antoninho Mauluta, orineta membru sira kontinua firme garante seguransa ba selebrasaun tinan foun 2023 la’o ho pás no establidade.
Atu garante situasaun hakmatek, ekipa konjunta komapostu hosi Task-Force sei koordena ho Batallaun Ordem Públika (BOP) no Falintíl Forsa Defeza Timor-Leste (F-FDTL) atu halo patrulamentu tama sai bairru.
Notísia Relevante: PNTL Bobonaro sei kontrola joven hemu lanu iha prezépiu oin
“Ita-nia seguransa la’o nafatin, komandu ne’e komanda no orientá nafatin atu seguransa ne’e la’o tanba seguransa ne’e iha instituisaun rua nia liman. Ne’ebé, ita komandu hala’os egiuransa nafatin, atu kontra saida de’it mak viola regra no lei,” nia hateten ba jornalista sira, iha nia kna’ar fatin, sábadu ne’e.
Tamba ne’e, nia apela ba komunidade liu-liu joven sira atu koopera ho ekipa konjunta hodi kumpre lei no orden ne’ebé estabelese ona iha terrenu.
“Ita husu atu fó tempu uitoan ba polísia lori kontrola ba situasaun ida-ne’e, no mós ita antes atu husik tinan tuan, ita moris dame no hakmatek,” nia hateten.
Enkuantu autoridade seguransa mós daudaun ne’e koordena ho parte balun kona-ba oinsá atu autoriza komunidade tiru fugeti iha 31 kalan hodi simu tinan foun.
“Se mak iha fugeti mai aprezenta an, nune’e ita bele buka fodik fatin, ita konsentra hamutuk la’ós ida-idak tiru ninian hanesan dadauk akontese ona. Tiru halai ba kona ema-nia ofisina balun, akontese ahi han ema nia sasán no labele tiru iha estrada klaran. Bainhira ita-nia inan feton sira sai misa, sasán ne’e halai hosi fali alkatraun ba belit ema ne’ebé sai misa, ida-ne’e mak ita husu atu koordena para sunu hamutuk iha fatin ida,” nia apela.
Sekretariu autoridade munisípiu Bobonaro, Joao de Fátima do Carmo, husu ba komunidade liu-liu joven sira atu ida-idak halo reflesaun ba hahalok tinan tuan nia, hodi simu tinan foun ho domin no dame
“Iha tinan foun mai, esperansa boot, ita ida-idak ho konxiénsia halo reflesaun ba ita-nia an katak iha tinan tuan iha hahalok sira-ne’ebé ladi’ak, ita halo mudansa. Tinan foun iha esperansa katak mai ita kontribui tanba tinan 2023 ne’e tinan politika, lakle’ur ita sei tama ba iha eleisaun parlamentár. Ho ida-ne’e, ita tenke prepara ita nia an atu kontribui ba dezenvolvimentu,” nia hateten ba Agência Tatoli iha nia kna’ar fatin, sesta (30/12/2022) ne’e.
Maibe, tuir nia, iha selbrasaun tinan foun ne’e importante liu mak foinsae sira presiza tau ida-idak nia-an hanesan ema-ne’ebé matenek no maduru hodi garante pás no establidade, atu nune’e partisipa festa ne’e ho haksolok.
“Ha’u lori autoridade nia naran hato’o ksolok natál no boas entrada tinan foun 2023 ba komunidade hotu, ho esperansa katak tinan foun ida-ne’e ita bele hamutuk hodi dezenvolve ita-nia munisípiu Bobonaro,” nia dehan.
Notísia Relevante : PNTL Bobonaro sei kontrola fogete iha loja no merkadu
Jornalista : Sérgio da Cruz
Editór : Cancio Ximenes
