Ajénsia TPAY sei halo pagamentu ba bolsa da màe jerasaun foun
DILI, 13 janeiru 2023 (TATOLI)–Diretór Jerál Ministériu Solidariedade Sosiál no Inkluzaun (MSSI), Florêncio Pina Dias Gonzaga, hateten iha fulan-janeiru ne’e Ajénsia TPAY Telekomsel hahú halo pagamentu tanba sira prosesa ona dokumentu benefisiáriu sira iha Ainaro no Bobonaro nian.
Notísia Relevante: MSSI aproxima Telkomcel halo pagamentu “bolsa da mãe jerasaun foun” iha Ainaro-Bobonaro
“Ajénsia TPAY Telekomsel hahú prosesa no iha janeiru ne’e hahú halo pagamentu ba benefisiáriu bolsa da mãe jerasaun foun iha Ainaro no Bobonaro. Maibé benefisiáriu ne’ebé iha konta bankária BNCTL nia ne’e la’o di’ak hela katak simu ona hosi banku refere,” Florêncio Pina Dias Gonzaga hateten ba Agência Tatoli, iha nia kna’ar ftain, Caicoli, sesta ne’e.
Progresu bolsa da mãe jerasaun foun iha Ainaro, Bobonaro, RAEOA, to’o agora la’o di’ak no prosesu rejistu kontinua ativa iha sentru saúde sira no to’o iha sesta (13 janeiru) ne’e ita iha totál aplikante hamutuk 14.000-resin kompostu hosi inan isin-rua 2.998, labarik 15.333 no labarik ho kondisaun defisiénsia hamutuk 66.
Prosesu pagamentu ba benefisiáriu fulan-juñu to’o dezembru 2022, iha Ainaro iha ne’e selu ona benefisiáriu hamutuk 85 no Bobonaro iha benefisiáriu 18 ba leten no sira-ne’e ho konta bankária BNCTL nian.
“Entaun iha fulan dezembru 2022, ne’e ita iha benefisiária elizivel ne’ebé mak ita halo ona inkrisaun no transfere ona osan ba banku ka ajénsia ne’ebé mak selu hamutuk 37-resin ho nia osan $905.560,” nia hateten.
Iha Ainaro ne’e, iha benefisiáriu kuaze 6.292 ho osan hamutuk $176.700, Bobonaro ho benefisiariu hamutuk 4.391 ho nia osan $106.015, no RAEOA iha benefisáriu hamutuk 27.914 ho nia osan hamutuk $661.195.
Husu kona-ba totál benefisiáriu boot liu totál aplikante, nia hatán, iha benfisiáriu balun ne’ebé mak rejistu iha sentru saúdene’e dala ruma inan ida ho nia oan rua no iha balun ho ida, entaun númeru benefisiáriu aumenta makaas.
Diretór ne’e hatutan, iha tinan ne’e psograma bolsa da mãe jerasaun foun sei implementa iha Manatuto, Viqueque, Liquiça no Covalima no nia prosesu mak iha ona faze rekrutamentu ba tékniku sira iha munisípiu haat refere.
“Bainhira ramata sei anúnsiu rezultadu iha fulan ne’e depois ita implementa iha fulan-fevereiru,” nia dehan.
Governu prevee osan ba programa bolsa da mãe jerasaun foun ba faze dahuluk munisípiu tolu no ba faze daruka munisípiu haat hamutuk miliaun $13.7
Jornalista : Osória Marques
Editór : Cancio Ximenes
