DILI, 13 janeiru 2023 (TATOLI)—Diretór Jerál Sekretariadu Tékniku Administrasaun Eleitorál (STAE), Acilino Manuel Branco, hateten timoroan ne’ebé hela iha Filipina posibilidade atu azerse sira-nia direitu votu hodi partisipa iha eleisaun parlamentár maibé depende ba desizaun hosi Konsellu Ministru.
Notísia Relevante: Timor-oan 156 iha Filipina bele partisipa eleisaun parlamentár 2023
“Ekipa konjunta ida hosi Ministériu Negósiu Estranjeiru no Kooperasaun no Sekretária Tékniku Administrasaun Eleitorál identifika ona sidadaun timoroan besik 300 ne’ebé hela iha Filipina maibé depende ba desizaun Konsellu Ministru,” Acilino manuel Branco hateten ba Agência Tatoli iha nia kna’ar fatin, Caicoli.
Nia esplika, númeru estudante no sidadaun sira-ne’ebé serví iha kongregasaun relijiaun nian mak barak liu no sidadaun sira-ne’e atu ezerse sira-nia direitu ba vota iha eleisaun oin mai, MNEK mak sei propoin iha sorumutuk Konsellu Ministrus nian.
“Karik Konsellu-Ministru aprova, ami-nia ekipa prontu atu hala’o operasaun ne’ebé lori povu ba vota,” nia hateten.
Kona-ba asuntu ne’e, Deputadu António Verdial, hateten opiniaun ida-ne’e tenke foti pasu sira hodi garante direitu atu vota ba sidadaun sira-ne’ebé hela iha Filipina.
“Ami iha sidadaun timoroan barak iha Filipina, tan ne’e ha’u hanoin katak importante tebes atu fó oportunidade ba sira atu vota,” nia dehan.
Númeru eleitór to’o iha fulan-dezembru 2022 hamutuk 878.712 ne’ebé kompostu hosi Aileu 34.706, Ainaro 46.945, Ataúro 2.600, Baucau 98.629, Bobonaro 72.811, Cavalima 48.830, Dili 192.934, Ermera 84.361, Lautém 49.380, Liquiça 51.925, Manatuto 35.999, Manufahi 41.574, RAEOA 53.151 no Viqueque 58.867.
Entretantu, eleitór ne’ebé agora resensiadu no atualizadu iha diáspora nian hamutuk 6.944, kompostu hosi Austrália hamutuk 1.462, Korea Súl hamutuk 1.237, Irlandia do Norte hamutuk 2.185, Portugál hamutuk 1.241 no Reinu Unidu hamutuk 819.
Jornalista : Osoria Marques
Editór : Cancio Ximenes
