DILI, 30 janeiru tinan 2023 (TATOLI)—Sekretária Estadu Terras no Propriedade (SETP) liuhosi Ministériu Justisa (MJ), entrega sertifikadu rai ba benefisiáriu Uma Kbiit Laek (UKL) hamutuk 39 no uma veteranu iha territóriu laran tomak.
Notísia Relevante: Governu lansa atribuisaun sertifikadu títulu na’in ba rai iha Oé-cusse
“Dezde lansamentu atribuisaun sertifikadu títulu, SETP entrega ona sertifikadu 39 ba benefisiáriu Uma Kbiit Laek sira,” Sekretáriu Estadu Terras no Propriedade, Eldino Rodrigues dos Santos, hateten ba Tatoli iha Mandarin, segunda ne’e.
Governante ne’e garante katak SETP kontinua rekolla dadus hodi entrega mós sertifikadu ba benefisiáriu UKL no veteranu sira.
Nia dehan, entrega sertifikadu ba benefisiáriu sira bazea ba rekezitu estatutu rai ne’ebé livre hosi disputa.
Diretor Jerál Sekretária Estadu Terras no Propriedade (SETP), Lucas António da Costa, hateten katak ekipa téknika kompleta ona levantamentu dadus kona-ba benefisiáriu sira iha munisípiu 12 inklui iha Rejiaun Administrativa Espesiál Oé-Cusse Ambeno (RAEOA).
Antes iha loron 27 novembru 2022, Primeiru-Ministru, Taur Matan Ruak no Ministru Justisa, Tiago Sarmento Amaral, lansa ona atribuisaun sertifikadu títulu ba rai neen (6) iha Rejiaun Administrativa Espesiál Oé-Cusse Ambeno (RAEOA).
Notísia Relevante: 28 novembru, Governu ofisializa atribuisaun sertifikadu rai ba komunidade
Jornalista : Osoria Marques
Editór : Cancio Ximenes
