Aban, kompañia Vieramor hahú normaliza estrada Galusapulu
BOBONARO, 02 fevereiru 2023 (TATOLI) – Kompañia Vieramor join venture ho kompañia Neze-Bonito ne’ebé hanesan responsável Obra, aban sesta (03/02) hahú mobiliza ekipamentu pezadu hodi normaliza estrada iha área Lekhi-Achi, aldeia Galusapulu, suku Lahomea, postu administrativu Maliana, munisípiu Bobonaro.
Tanba kondisaun estrada atuál ne’ebé rai taka-metin hotu hafoin akontese udan-boot durante loron-rua tuituir malu.
Diretór kompañia Neze-Bonito JV ho Vieramor, Martinho Vicente, promete ona Prezidente Autoridade Munisípiu Bobonaro, Ernesto de Oliveira Barreto no ohin atu hahú halo normalizasaun, maibé seidauk konsege tanba operadór makina eskavadór la tama serbisu.
Notísia relevante: Kondisaun estrada Galusapulu halo negosiante merkadu lokál Ili-Bole ladún hetan rendimentu
“Operadór ba Atambua ne’ebé ohin dadeersan nia mai ona, aban dadeer, tuku 08:00 tenke hatún mákina iha-ne’e, hodi halo normalizasaun aban, to’o bainrua no baintolu ne’e ema bele liu ba-mai ona,” Martinho informa ba jornalista sira, iha lokalidade akontesimentu, kinta ne’e.
Nia subliña, ekipamentu pezadu ne’ebé atu mai halo normalizasaun ne’e unidade ida de’it, tanba tuir levantamentu dadus ne’ebé tékniku Servisu Obra Públika munisípiu Bobonaro identifika katak estragu kuaze distánsia metru 100.
Purtantu kompañia utiliza rai ne’ebé atu aterru ba estrada laran ne’e mós bazea rekomendasaun hosi tékniku laboratóriu nasionál.
“Rai ne’e iha tiha ona, maibé ita halo normalizasaun provizóriu de’it, semana oin Parlamentu Nasionál sei mai halo Fiskalizasaun iha fatin ne’e, depois Ministru Obras Públika mós sei mai atu hola dalan ida haree lokaliza foun atu muda dalan ne’e, tanba atu kontinua iha-ne’e labele nafatin,” nia katak.
Konsellu lia-na’in hosi aldeia Galusapulu, suku Lahomea, Jacinto da Cruz, akresenta estrada refere tinan-tinan sempre hetan ameasa hosi dezastre naturál, tanba ne’e rekomenda ba parte relevante molok autoriza kompañia halo normalizasaun presiza tuur hamutuk ho lia-na’in sira atu rezolve uluk kultura hafoin bele hahú serbisu.
“Depois mak husik sira bele halo serbisu nune’e mai oin bele metin, sé ita-nia kultura mak la rezolve, o bele rai buat boot mós nia sei sai nafatin hanesan ne’e, iha futuru mai sei difikulta nafatin tranporte ne’ebé movimentu ba mai iha estrada ne’e,” nia afirma.
Sekretáriu autoridade munisípiu Bobonaro, João de Fátima do Carmo, reforsa autoridade munisipál hato’o ona proposta ba Ministériu Obra Públika atu hola medida urjénsia ba kondisaun estrada refere.
“Ita haree tanba kondisaun iha-ne’ebá, oinsá bele ita atu halo mudansa ba estrada ida sa’e ba ne’e, atu responde emerjénsia fasilita ema liu ba mai lai, depois ita buka alternativu loke dalan foun fali iha leten,” João hateten.
Notísia Relevante:Kondisaun estrada Galusapulu kalsu de’it ho ai-kabelak
Jornalista : Sérgio da Cruz
Editór : Evaristo Soares Martins
