OÉ-CUSSE, 04 fevereiru 2023 (TATOLI)–Eskola Bázika Filiál (EBF) no pre-eskolár Let-Mafo iha suku Cunha, sub-rejiaun Pante Makasar, RAEOA, kinta (02/02), simu ona apoiu mobiliáriu hanesan meza no kedeira hosi Dirasaun Edukasaun Rejiaun Administrativa Espesiál Oé-Cusse.
Sekretária Rejionál ba Asuntu Edukasaun no Solidariedade Sosiál, Abelina da Costa, hateten distribuisaun ba meza no kadeira hamutuk unidade 86 ne’e oferese ba iha ensinu báziku Let-Mafo no pré-eskolár Let-Mafo tanba eskola ne’e foin harii iha 2021.
“Polítika ne’e nia objetivu atu fasilita ensinu aprendizajen nian, tanba kondisaun eskola sira foin harii, entaun iha tinan kotuk 2022 ita tau iha planu ba tinan ne’e hodi fornese mobiliáriu liu-liu meza no kadeira ba alunu sira atu hala’o prosesu aprendizajén ho di’ak,” Abelina da Costa hateten ba Agência Tatoli liuhosi telefónika, sábadu ne’e.
Nia informa, iha tinan 2021 ne’e harii eskola foun hamutuk 14 no iha 2022 reabilita eskola neen (6), tanba ne’e iha 2022 ne’e Edukasaun Oé-Cusse prevee orsamentu halo akizisaun fornese mobiliariu ba eskola sira-ne’e hodi kompleta fasilidade eskola sira liu-liu meza no kadeira.
Dirijente edukasaun ne’e hateten, lansamentu ba distribuisaun ne’e realiza ona iha semana kotuk, nune’e ba eskola foun 21 seluk sei distribui fazeadamente.
Tan ne’e, nia enkoraja no husu inan-aman, estudante sira liu-liu ba Assosiasaun Inan-Aman no Profesór (AIAP) hodi servisu hamutuk no kontribui apoiu asegura fasilidade eskola ho di’ak.
“Ita-nia eskola sira-ne’e foin harii iha tinan kotuk ho inisiativa rasik no kontribuisaun inan-aman, maibé tinan kotuk autoridade RAEOA tau ona iha planu hodi konstrui Eskola Foun ba Pre-eskolár iha tinan ida-ne’e,” nia dehan.
Entretantu, distribuisaun mobiliáriu 86 ne’e komposta hosi meza neen (6) no kadeira 30 ba estudante 64 iha Pre-eskolar Let-Mafo Nunuheno no kadeira-meza unidade 50 ba estudante EBF Lete-Mafo 113.
Entretantu, fornesedór ba mobiliáriu hirak ne’e e hosi empreza Vitorlay Unipesoál, Lda ho valór kontratu hamutuk $249,890.96, autoridade RAEOA prevee hosi Orsamentu Jeral Estadu (OJE) 2022.
Jornalista : Abílio Elo Nini
Editór : Cancio Ximenes
