Estabelese sentru votasaun paralelu iha munisípiu hein diskusaun espesialidade
DILI, 07 fevereiru 2023 (TATOLI)–Diretór Jerál Sekretariadu Tékniku Administrasaun Eleitorál (STAE), Acilino Manuel Branco, hateten atu estabelese sentru votasaun paralelu iha munisípiu hein diskusaun espesialidade iha Komisaun A Parlamentu Nasionál.
Notísia Relevante: Deputadu PD propoin estabelese sentru votasaun paralelu iha munisípiu
“Espera katak iha diskusau ne’e hetan konkordánsia ruma nune’e bele estabelese mós sentru paralelu iha munisípiu sira balun. Maibé ha’u hanoin ida-ne’e atu di’akliu implementa lai iha Dili, depois ita kontinua haree katak bele ona mak ita sei alarga tan iha munispíu sira iha eleisaun sira tuir mai,” Acilino Manuel Branco hateten ba Agência Tatoli, liuhosi telefónika, tersa ne’e.
Maibé, nia dehan, ida-ne’e sei iha diskusaun espesialidade nian iha Komisaun A Parlamentu Nasionál, esensiál mak atende lai ema hosi munisípiu sira-ne’ebé iha kapitál halo servisu no eskola tanba munisípiu sira laharee ezijénsia ba iha eleisaun ne’e.
Sentru paralelu ne’e modelu ida maibé nia intensaun mak oinsá bele fó soluasuan liu-liu ba komunidade hela iha Dili, tanba ema hotu mai konsentra iha ne’e.
Tanba, tuir nia, estabelesimentu sentru paralelu mós iha ninia regra no kritériu sira mak mínimu iha sentru ida ema tenke 100 mak bele estebelese sentru paralelu.
Notísia Relevante: STAE mak sei sertifika votante sira rejistu iha sentru votasaun paralelu
Jornalista : Osória Marques
Editór : Cancio Ximenes
