INSS sei submete proposta subsídiu ema moras ba Konsellu Ministru
DILI, 07 fevereiru 2023 (TATOLI)–Prezidente Konsellu Administrasaun Institutu Nasionál Seguransa Sosiál (INSS), Longunihos Armando Leite, hateten tinan ne’e INSS hamutuk ho Ministériu Solidariedade Sosiál no Inkluzaun (MSSI) prepara proposta subsídiu ba ema moras hodi aprezenta ba Konsellu Ministru (KM).
Notísia Relevante: Kontribuente kontribui ona millaun $115.9 ba Fundu Rezerva Seguransa Sosiál
“Agora daudaun ne’e ita prepara ona proposta subsídiu ba ema mora hodi lori ba Konsellu Ministru,” Prezidente INSS ne’e hateten ba Agência Tatoli lihois programa Entrevista Eskluziva ho tema ‘Implementasaun Seguransa Sosiál iha Timor-Leste”, iha studio Faról, segunda ne’e.
Nia dehan, presiza hanoin ona subsídiu ba ema moras, liu-liu sira-ne’ebé hetan moras iha servisu fatin, ezemplu hetan xoke hosi eletresidade ne’e risku ba traballadór.
Maibé, nia dehan, agora ne’e la’o lai ho subsídiu lima hanesan subsídiu mate, maternidade durante fulan tolu, paternidade loron lima, iha mós risku kliniku ba inan-feton sira-ne’ebé hetan risku bainhia gravida hela.
Ida-ne’e, tuir nia, tenke aplika tanba dala ruma parte saúde rekomenda dehan inan gravida labele halo servisu iha oras ualu nia laran maibé nia servisu iha oras haat de’it.
“Entaun ninia empreza selu nia oras haat nian no ita seguransa sosiál selu oras haat mós no iha subsídiu ikus mak subsídiu adosaun ba ema-ne’ebé mak hakarak adosaun labarik sira presiza apoiu ema-ne’e hodi ema-ne’e adota ho labarik durante fulan tolu,” nia dehan.
Jornalista : Osória Marques
Editór : Cancio Ximenes
