AMD husu abitante labele hela iha área risku dezastre naturál
DILI, 10 fevereiru 2023 (TATOLI)—Adjuntu Prezidente Autoridade Munisípiu Dili (AMD), António Moniz Clau, hateten atu muda sai abitante ne’ebé hela iha área risku hanesan hela iha mota-ninin ka rai-lolon sira-ne’e, AMD seidauk iha kondisaun mínimu maibé husu atu labele hela iha fatin risku dezastre naturál.
Notísia Relevante: Taur mehi Dili sai furak, populasaun bahat Dili sai sabraut
“Itá seidauk iha kondisaun mínimu atu muda sai ema ne’ebé hela iha fatin risku sira, maibé bainhira akontesementu iha 4 abríl tinan kotuk ne’e, ita konsege haruka fila ita-nia maluk 100-resin. Entaun iha ne’e ita la autoriza ona ema atu hela iha fatin risku tanba ita hamutuk ho protesaun sívil kontinua halo monitorizasaun ba fatin risku sira hanesan iha Hera, Ailook-laran, inklui sira hela iha mota Manleuana nian no mós mota Tasi-Tolu,” nia dehan ba Agência Tatoli liuhusi telefónika, sesta ne’e.
Nia hatutan, aban bainrua AMD iha ona kondisaun fatin própriu mak haruka sira muda maibé daudaun ne’e seidauk iha kondisaun mínimu atu akumula sidadaun sira-ne’e hela iha fatin ida seguru.
Governu liuhosi AMD implementa ona lei 2003/2018 hodi hatun orientasaun ba estrutura iha suku no aldeia sira atu kontinua fó hanoin ba komunidade, liu-liu iha área risku labele hari uma ka konstrui ruma iha fatin sira ne’ebé AMD detekta ona risku.
“Ida-ne’e, ita sempre hatun orden no agora daudaun ita hatun orden ba suku no aldeia sira atu kontinua fó hatene ba komunidade,” nia dehan.
Jornalista : Osoria Marques
Editór : Cancio Ximenes
