VIQUEQUE, 16 fevereiru 2023 (TATOLI)— Diretór Eskola Ensinu Sekundáriu Jerál (ESG) Calixa iha suku Uma-ki’ik, postu administrativu Viqueque-vila, munisípiu Viqueque, informa konstrusaun fíziku ba projetu komunitáriu eskola refere atinje ona 75%.
“Ami-nia konstrusaun fíziku atinje 75%, maibé pagamentu ba faze datoluk ho 75% mak seidauk halo. Nune’e ami sei hein tékniku hosi nasionál mai halo levantamentu hafoin kontinua konstrusaun”, Diretór Eskola Calixa ne’e hateten ba Agência Tatoli, iha eskola Calixa, suku Uma-Ki’ik, kinta ne’e.
Tanba ne’e, nia dehan grupu komunitáriu sei hein hela pagamentu ne’e hodi kontinua halo konstrusaun ba to’o 100%.
” Tama ona faze 75% tanba hahú taka ona kalen no reboka,nune’e hein faze dahaat atu tau janela, odamatan hodi kompleta ba 100% nian”, nia afirma.
Resposavél ne’e afirma kontinua orienta tékniku, traballadór inklui badaen sira atu konstrui projetu ne’e tuir dezeñu hodi bele garante kualidade.
Konstrusaun edifísiu ESJ Calixa ho kustu $113.359,66, ho sala tolu no sentina ida. Projetu komunitáriu ne’ebé implementa iha Viqueque lansa fatuk dahuluk iha fevereiru 2022 ba konstrusaun infraestrutura iha eskola 18.
Notísia relevante: Progresu projetu komunitáriu Eskola ESJ Calixa atinje 26,8%
Jornalista :Vitorino Lopes da Costa
Editór : Florencio Miranda Ximenes
