Brigada sira sei halo edukasaun votante ba eleitór sira iha marsu
DILI, 16 fevereiru 2023 (TATOLI)—Diretór Jerál Sektretariadu Tékniku Administrasaun Eleitorál (STAE), Acilino Manuel Branco, hateten STAE rekruta ona brigada no ofisiál eleitorál sira hamutuk rihun 19-resin, ne’ebé sei halo edukasaun votante ba eleitórsira iha territóriu nasionál iha marsu nia laran.
Notísia Relevante: STAE sei rekruta brigada 100 ba eleisaun parlamentár 2023
“Iha fulan-marsu nia-laran, ita-nia brigada sira-ne’ebé STAE rekruta ona ne’e tun ba terrenu hodi halo edukasaun votante ba ita-nia eleitór sira iha Timor-Leste,” Acilino Manuel Branco hateten ba Agência Tatoli, liuhusi telefónika, sesta ne’e.
Tanba, tuir nia, maske iha 14 fevereiru 2023 ne’e liuhosi plenária Parlamentu Nasionál aprova ona proposta alteraaun lei eleitorál ba PN, maibé edukasaun votante ne’e iha fulan-marsu nia laran bele hahú ona.
Númeru eleitór to’o iha fulan-dezembru 2022 hamutuk 878.712 ne’ebé kompostu hosi Aileu 34.706, Ainaro 46.945, Ataúro 2.600, Baucau 98.629, Bobonaro 72.811, Cavalima 48.830, Dili 192.934, Ermera 84.361, Lautém 49.380, Liquiça 51.925, Manatuto 35.999, Manufahi 41.574, RAEOA 53.151 no Viqueque iha eleitór hamutuk 58.867.
Ho nune’e, eleitór ne’ebé agora resensiadu no atualizadu iha diáspora hamutuk 6.944 ne’ebé kompostu hosi Austrália iha eleitór hamutuk 1.462, Korea Súl 1.237, Irlandia do Norte 2.185, Portugál 1.241 no Reinu Unidu iha eleitór hamutuk 819.
Jornalista : Osória Marques
Editór : Cancio Ximenes
