STAE Viqueque hahú rekruta brigadista no pontu fokál 117

VIQUEQUE, 17 fevereiru 2023 (TATOLI)- Sekretáriu Tékniku Administrasaun Eleitorál (STAE), Munisípiu Viqueque, halo ona rekrutamentu ba brigadista hamutuk na’in-112 no pontu fokál na’in-lima hodi prepara ba eleisaun parlamentár ne’ebé sei akontese iha 21 maiu 2023.
“Preparasaun ba eleisaun Parlamentár ami hahú halo rekrutamentu ba kandidatu brigadista no pontu fokál. Iha rekrutamenta kandidatu brigadista hamutuk na’in-349, maibé la tuir teste na’in 74 no kandidatu pontu fokál na’in 77, maibé na’in 30 maka tuir texte eskrita. Ba rekrutamentu ne’e ami presiza brigadista na’in-112 hodi koloka ba sentru votasaun 112 no pontu fokál na’in 5 hodi koloka iha postu lima. Teste eskrita la’o ona agora tama koresaun”, Diretór STAE munisípiu Viqueque, Humberto Fernandes, hateten ba Agência Tatoli, iha ninia kna’ar fatin Beloi, sesta ne’e.
Daudaun, STAE Viqueque hahú prepara rekursu, resensiamentu eleitóral no armazein atu rai materiál sensitivu no materiál naun sensitivu balun ne’ebé sei mai husi STAE nasionál.
“Ohin, ami hahú distribui kalendáriu ba ita-nia autoridade lokál, autoridade seguransa, partidu polítiku sira hodi bele asesu ba kalendariu eleisaun nian hodi sidadaun sira bele hatene regra no lalaok eleisaun”, nia afirma.
Kona-ba edukasaun vontante, Resposavél ne’e dehan: “ami sei hala’o uluk ba eleitór foun, hafoin resensiamentu eleitorál ramata. Nune’e iha tempu badak ami sei halo edukasaun votante ne’e brigadista sira sei tun ba baze atu hanorin inan-aman idade avansadu sira no estudante eleitór foun sira hodi ezerse sira direitu votu ho loloos”.
Sentru Votasaun sei estabelese iha munisípiu Viqueque ba eleisaun parlamentár hamutuk 112 no estasaun votasaun hamutuk 135. Tuir dadus eleitór munisípiu Viqueque provizóriu na’in-58.867 kompostu husi mane 29.938 no feto 28.897.
STAE Viqueque mós halo identifika estrada liga ba sentru votasaun sira iha área haat mak aat hodi difikulta distribuisaun materiál eleisaun hanesan Uatulari liga ba Iraler no Sana, parte Ossu Nahareka no Uiabobo no Lacluta nian dalan ba Luhan Raikuak.
“Iha eleisaun tinan kontuk, ami husu apoia ba Ministériu Agrikultura no Peska (MAP) Viqueque fó apoia tratór boot mak tula urna no materiál ba sentru votasaun sira ne’ebé dalan aat. Nune’e iha tinan ida-ne’e ami identifika ona dalan sira ne’e hato’o pedidu ba Ministériu Obra Públiku (MOP) atu hadi’a dalan sira hodi labele difikulta eleisaun parlamentar,” nia sujere.
“Se karik MOP la hadia dalan, ami sei husu apoiu ba MAP hodi ajuda tratór hodi tula materiál eleisaun ba sentru votasaun atu eleisaun bele la’o ho susesu”.
Jornalista : Vitorino Lopes da Costa
Editór : Florencio Miranda Ximenes

