DILI, 06 marsu 2023 (TATOLI)—Xefe Operasional hosi Ajénsia Lai-Ara Shipping, Jorgino Ribeiro, hateten, iha loron 08 marsu 2023 ró Kruzeiru MS Paul Gauguin hosi Austrália tula turista internaisonal sei mai vizita tan Timor-Leste (TL).
Ró Kruzeiru MS Paul Gauguin hosi Austrália, antes ne’e tula ona turista internaisonal vizita TL iha fulan fevereiru liu ba ne’ee.
Jorjino Ribeiro, hateten, ró Kruzeiru MS Paul Gauguin ne’e rasik, hosi Austrália maibé sira mai Vizita Timor-Leste ne’e hosi Illa Komodo Indonézia mak mai.
“Bainrua ita hetan tan vizita hosi ró Kruzeiru MS Paul Gauguin hosi Austrália mai vizita Timor-Leste no tula turista hamutuk 204. Hosi total ida ne’e la inklui ho tékniku sira ne’ebé servisu iha ró laran,” Jorgino Ribeiro dehan ba Agência Tatoli, liuhosi telefónika segunda ne’e.
Notisia relevante : 02 fevereiru, turista 232 ho ró Kruzeiru MS Paul Gaugauin sei atraka iha Dili
Nia dehan, turista 204 ne’e bainrua sei to’o Portu Dili iha oras 07H00 dadersaan no durante iha Dili oras balu de’it loraik iha tuku 18h00 sei kontinua halo viajen ba fali Papua Indonézia.
Durante sira iha Dili, fatin sira ne’ebé sei vizita mak hanesan Centro Nacional Chega (CNC), Arkivu Muzeu Rezisténsia Timorense (AMRT), Tais Market Colmera, Cristo Rei, Ermera ba vizita Timor Global kafé nian iha Railaco no Liquiça Maubara.
Diretór Jerál Turizmu iha Ministériu Turizmu Komérsiu no Indústria (MTKI), Jelino Soares, hateten, hosi vizita ró Krizeiru MS Paulo Gauguin ne’e rasik, antes ne’e Primeiru Ministru oriente ona MTKI halo preparasaun hanesan dansa kulturál sira hodi simu turista sira.
“Turista sira to’o mai, ita sei simu ho dansa kulturál, tuir orientasaun hosi Primeiru Ministru. Ita mós sei koordena grupu artezenatu sira tau sira-nia produtu no grupu tais balu atu tau iha iha Portu Dili, maibé ita mós iha Tais Market ne’ebé turista sira sei vizita,” nia dehan.
Notisia relevante : MTKI ho ajénsia Lai-Ara prepara bus sia simu turista estranjeiru 232
Turista 204 ne’e, mai hosi nasaun hanesan, Austrália, Brazil, Kánada, Fransa, Polándia, Indonézia no seluk tan.
Jornalista : Arminda Fonseca
Editora : Armandina Moniz
