MTKI sei koopera ho EDTL,E.P halo instalasaun ahi iha fatin turístiku sira
DILI, 09 marsu 2023 (TATOLI)— Ministériu Turizmu Komérsiu no Indústri (MTKI), ba oin sei orienta ba kompañia manán nain sira halo kooperasaun ho Eletrisidade de Timor-Leste, Empreza Públika (EDTL,E.P) bainhira atu halo instalasaun ahi iha fatin turístiku sira.
Diretór Jerál Turizmu, Jelino Soares, rekoñese ligasaun ba liña eletrisidade ba iha fatin turístiku sira, Governu loke konkursu públiku ba kompañia sira bainhira manán, sira rasik implementa duni projetu servisu iha fatin turístiku sira ne’ebé identifikadu.
“Maibé ba oin, ita loke konkursu públiku ba kompañia sira, bainhira manán atu kaer projetu ruma iha fatin turístiku sira liuliu ligasaun ho liña eletrisidade ita sei orienta kompañia atu halo kooperasaun ho EDTL,E.P, molok halo instalasaun fiu iha terrenu hodi EDTL,E.P mós hatene lala’ok instalasaun fiu. Nune’e buat ruma akontese sira mós hatene,” Jelino Soares dehan ba Agência Tatoli iha nia-knaar fatin, Farol, Dili, kinta ne’e.
Notisia relevante : Kompañia privadu monta ahi iha fatin turístiku, Latino : presiza koopera ho EDTL
Nia dehan, ko’alia kona-ba servisu koordenasaun ne’e di’ak, tanba MTKI rasik mós antes ne’e, halo ona koordenasaun ho EDTL,E.P kona-ba servisu dada liña eletrisidade ba sítiu turístika sira ne’ebé identifikadu no planu atu dezenvolve.
“Antes ne’e, ami mós halo ona koordenasaun serbisu ho EDTL,E.P, hodi koopera malu ligadu ho infrastrutura bázika iha sitiu turiztiku sira ne’ebé tama ona iha programa Turizmu Komunitáriu liuliu foka ba suku sira ne’ebé ministériu estabelese ona grupu traballu. Tanba sítiu turístiku balun seidauk asesu liña eletrisidade,” nia dehan.
Jornalista : Arminda Fonseca
Editora : Armandina Moniz
