DILI, 10 marsu 2023 (TATOLI)—Ministériu Administrasaun Estatál (MAE), sesta ne’e, lansa fatuk dahuluk ba projetu konstrusaun hodi transforma lixeira Tibar ba ateru kontroladu.
Notísia Relevante: Asosiasaun Estudante Liquiçá husu rezolve lixeira Tibar labele fó impaktu saúde
Ministru Administrasaun Estatál (MAE), Miguel Pereira de Carvalho, hateten projetu ida-ne’e importante ida hosi kompromissu VIII Governu Konstitusionál nian hodi proteje meiu ambiente no saúde públika.
Ida-ne’e, nia dehan, hanesan estratéjiku tebes ba dezenvolvimentu iha Timor-Leste, tanba sei substitui lokál de lixu ba céu aberto ne’ebé prejudika tebes ema-nia saúde nó estraga meiu ambiente.
“Projetu ne’e sei hamate ahi ne’ebé durante han lixu iha Tibar, sei ke sai hotu lixu ezistente sira, tau lona permeavel hodi satan lixiviadu sira tama ba rai-laran hodi ense fali ho lixu foun. No, kanaliza lixiviadu sira ba fatin apropriadu hodi nune’e halo lixeira iha Tibar ne sai tia Aterru Kontroladu,” Ministru Miguel hateten liuhosi nota imprensa ne’ebé Agência Tatoli asesu, sesta ne’e.
Governante hatutan, aterru kontroladu Tibar ne’e sei lori benefísiu barak tebes ba populasaun lokál sira, sei hamosu empregu, aumenta ekonómia lokál no mellora kondisaun moris ema barak nian ne’ebé hela besik fatin ne’e.
Projetu ne’e sei kontribui hodi hadi’ak liután saúde públika, nune’e bele redús espozisaun populasaun nian ba residous perigu boot no prevene hosi moras ne’ebé iha tanba falta hosi saneamentu bázika.
Projetu ne’e nu’udar ezemplu ida-ne’ebé bele konsilia kresimentu ekonómia ho preservasaun ida ba meiu ambiente no ba promosaun saúde públika.
Projetu ne’e sei konstrui hosi Companhia China Harbour Engeneering Company Limited, Joint Venture ho PAX Cleaning Service no Pioner, sei hahú operasaun konstrusaun imidiatamentu no nia prosesu konstrusaun durante tinan hitu (7) ne’ebé sei hahú hahú tinan (2023) ne’e.
Notísia Relevante: PN husu Autoridade Munisípiu Dili halo jestaun ba lixeiru Tibar
Jornalista ; Osória Marques
Editór : Cancio Ximenes
