CNE hala’o edukasaun sívika ba estudante TEKVOK Mau-Mali
MALIANA, 28 marsu 2023 (TATOLI) – Komisaun Nasionál Eleisoens (CNE, sigla portugés), tersa ne’e hala’o edukasaun sívika ba estudante Ensinu Sekundáriu Tékniku Vokasionál Dom Bosco Mau-Mali iha suku Ritabou, postu administrativu Maliana, munisípiu Bobonaro.
Edukasaun sívika ne’e realiza hodi hametin sentidu pertense no eleva taxa partisipasaun iha eleisaun parlamentár ne’ebé tuir kalendáriu realiza iha loron 21 fulan-maiu tinan 2023.
Diretór CNE munisípiu Bobonaro, Juvito Ramos, esplika atvidade ne’e nia alvu mak estudante sira-ne’ebé atinje ona idade 17 ba leten, tanba konsidera hanesan eleitór foun ne’ebé foin primeira vez atu partisipa iha eleisaun.
Iha atividade edukasaun sívika ne’e atu fó koñesimentu ba estudante sira oinsá bele hanesan kona-bá regra no prosedimentu kampaña eleitorál, krime eleitorál, sistema eleitorál prosedimentu hato’o keixa no reklamasaun.
Notísia relevante: CNE-STAE hala’o edukasaun sívika ba eleitór sira iha Tapo
“Objetivu hosi edukasaun sívika ne’e, ita atu eleva taxa partisipasaun eleitór sira, atu nune’e sira bele partisipa másimu iha eleisaun ho másimu no bele aumenta tán taxa partisipasaun,” nia informa ba Jornalista sira iha salaun mutltifunsionál TEKVOK, Dom Bosco, Mau-Mali, hafoin realiza atividade.
Estudante Finaslita TEKVOK Dom Bosco Mau-Mali, Melisa Venisa Martins Freitas, sente kontente no agradese bele partisipa iha atividade ne’e, tanba liuhosi edukasaun sívika bele hasa’e liután sira-nia koñesimentu kona-bá lala’ok eleisaun nian.
Enkuantu atividade edukasaun sívika ne’e realiza ba dala-haat tanba antes ne’e CNE halao’o ona iha Eskola Sekundariu Jerál Balibo, Eskola Tékniku Vokasionál Atabae, Eskola Sekundáriu Jerál Katólika Palaka, no sei reazlia mós iha Eskola Ensinu Sekundáriu Jerál númeru I Dom Martinho da Costa Lopes, Maliana.
Notísia relevante: CNE sei hala’o edukasaun sívika iha diáspora
Jornalista : Sergio da Cruz
Editór : Evaristo Soares Martins
