Mudansa klimátika difikulta kompañia sira aselera Projetu Eletrifikasaun Nasionál iha Bobonaro
MALIANA, 30 marsu 2023 (TATOLI) – Koordenadór Eletrisidade Timor-Leste, Empreza Públika (EDTL,E.P), Munisípiu Bobonaro, Mário de Jesus, fó-sai katak, mudansa klimátika difikulta kompañia sira aselera Projetu Eletrifikasaun Nasionál (PEN) tinan 2022 nian ne’ebé implementa iha suku no aldeia sira.
Koordenadór fó-sai difikuldade ne’e bazea ba eletrisista sira halo monitorizasaun tékniku iha terrenu observa kondisaun mudansa klimátika durante ne’e difikulta komapañia sira.
Notísia relevante: EDTL finaliza ona projetu liña eletrifikasaun komunitária tolu iha Bobonaro
“Tuir loloos projetu sira-ne’e ninia data finalizasaun ne’e labele iha 2023, maibé ho mudansa klima mak la fó tempu ba ita atu halo obra ida-ne’e, maske ita-nia kompañia sira servisu nafatin atu atinje obra ne’e, mas prontu udan la para mak halo ita-nia projetu sira-ne’e atraza,” nia informa ba jornalista sira, iha Maliana, kinta ne’e.
Nia haktuir, PEN 2022 ne’ebé finaliza ona mk iha suku Guda tanba komunidade sira mós asesu hotu ona, maibé sira-ne’ebé agora sei l’ao hela mak iha suku Saburai, hosi suku Holsa ba suku Tapo-Memo.
Nune’e mós hosi suku Saburai kontinua ba Atus, no ida hosi aldeia Bilicou, suku Holsa ba aldeia Pipgalak II, suku Tapo-Memu.
Pakote ida hosi aldeia Nunutana ba aldeia rua iha suku Raiheu, postu administrativu Cailaco no suku Cowa, postu administrativu Balibo.
Mário dehan, tékniku EDTL,E.P kontinua halo ba terrenu halo supervizaun ba obra sira hirak-ne’e tanba hahú hosi semana kotuk to’o agora volume udan komesa menus ona.
“Ami-nia tékniku no ha’u rasik mós tún iha baze, fó hela motivasaun no orientasaun ba sira katak, ita-boot sira-nia kontratu ne’ebé EDTL,E.P fó ne’e mak la finaliza tuir tempu, entaun kestaun ida-ne’e, ita-boot sira komapañia ho nasionál nian,” Mário haktuir.
Responsável EDTL,E.P Munisípiu Bobonaro mós atualiza kona-ba Projetu Eletrifikasaun Komunitária (PEK) ho distánsia 10 mai karik, ne’ebé EDTL,E.P rasik mak fornese materiál no apoia tékniku serbisu hamutuk ho komunidade kuaze hatudu progresu di’ak.
Tanba iha aldeia Daitete no Asulau, suku Manapa instaladu no ahi lakan hotu ona, inklui aldeia Nunura parte suku Leo-Lima, postu administrativu Balibó no aldeia Pisu-Laran, suku Meligo, postu administrativu Cailaco mós komunidade asesu hotu ona.
Enkuantu obra sira-ne’ebé sei la’o hela mak iha aldeia Bour Surilaku, suku Leo-Lima, postu Balibo, aldeia Hualaran no Huamerese, suku Sanirin.
Notísia relevante: EDTL sei troka poste elétrika tuan hosi Nunura to’o Lahomea
Jornálista : Sérgio da Cruz
Editór : Evaristo Soares Martins
