AINARO, 24 abril 2023 (TATOLI) – Komandante Polísia Nasionál Timor-Leste (PNTL)husi munisípiu Ainaro, Superintendente Polísia Paulino Carmo Pereira, informa desde abertura kampaña eleitorál husi Partidu K’manek Haburas Unidade Nasionál Timor Oan (KHUNTO), iha loron kuarta (19/05), situasaun seguransa iha munisípiu ne’e kontroladu no seidauk rejista asidente ruma.
“Kampaña eleisaun parlamentar hahú iha loron 19 to’o 25 abríl 2023, iha munisípiu Ainaro, hanesan ita hotu hatene partidu bo’ot rua ne’ebé mak halo ona komísiu iha Ainaro Vila, nomos mini kampaña no door to door husi partidu sira seluk iha postu administrativu haat [Ainaro, Hatu-Udo, Hatu-builico no Maubisse)]. Liga ho situasaun ida ne’e, Ainaro provizóriu sei kontroladu, la rejista asidente ruma ne’ebé signifikante nomos la rejista infrasaun ba kódigu estrada”, Superintendente Polísia Paulino Carmo Pereira hateten ba jornalista sira, iha Komandu PNTL, iha Ainaro Vila, segunda ne’e.
Nia dehan situasaun ne’e kontroladu, tanba seksaun sira hanesan tranzitu, investigasaun no sira seluk ne’ebé mak koloka iha terrenu.
Superintendente Polísia ne’e apela ba komunidade, apoiante no simpatizante partidu polítiku sira ne’ebé atu halo kampaña iha Ainaro atu obedese nafatin ba regra hodi kontribui ba pás no estabilidade.
Notísia relevante: PNTL Bobonaro sei apoia UPF kontrola fronteira iha loron eleisaun
Jornalista: Afonso do Rosário
Editora: Isaura Lemos de Deus
