Projetu salaun Pro-Katedrál Maliana gasta rihun $721-resin
MALIANA, 25 abrl 2023 (TATOLI) – Projetu konstrusaun salaun misa Pro-Katedrál Santa Cruz, Maliana ne’ebé inaugura hosi Bispu Dioseze Maliana, Dom Norberto do Amarál, gasta $721,261.70.
Salaun misa Pro-Katedrál Maliana ne’e inaugura iha loron-segunda, 24 abríl 2023 hosi Bispu Dioseze Maliana, Dom Norberto do Amaral no ezekuta hosi ezmpeza Rai-Mean Unipesoál Lda.
Notísia relevante : Frater na’in-haat simu ordenasaun diakonál iha Maliana
Pároku Santa Cruz, Maliana, Padre Valerio Gusmão, esplika, maske salaun refere inaugura ona maibé ninia progresu fízika atinje 90% ba leten.
Notísia relevante: Uma kreda TL lansa Tribunál Ekleziástika Interdiosezanu Maliana-Baucau
“Totál orsmentu halo salaun ida-ne’e $721,261.70. Fonte orsmentu ne’e simu hosi Governu fó ba Dioseze aloka ba Parókia hodi hala’o salaun ida-ne’e,” Padre Valerio Gusmão esplika iha ámbitu selebrasaun ezisténsia Dioseze Maliana ba dala-13 no aniversáriu tinan-50 Igreja Santa Cruz, Maliana no ordenasaun frater nai’in-haat ba diákonu, tersa ne’e.
Maske hahú konstrusaun to’o ohin loron hasoru difikuldade oinoin maibé konsege implementa ho susesu tanba hetan apoia másimu hosi parte hotu-hotu.
Bibi-atan ne’e fó-sai katak, dezafiu seluk ne’ebé sira mak molok atu hahú obra, iha kompañia lokál barak mak hadau malu to’o ema balu mak deskonfia no Padre Valerio fó de’it projetu ne’e ba família.
“Ha’u dehan ba sira, ha’u moris mak iha Suai, boot iha Uatulari, eskola semináriu kauze konklui iha Maliana ida-ne’e mak ha’u fó ba sira,” Padre Valerio re-lembra.
Dezafiu seluk tán mak dalaruma iha implementasaun obra parte Igreja no kompañia hirus-malu oituan, oin-to’os ba malu tanba hakarak aselera projetu ne’e.
“Maibé Maromak uza maneira ida-ne’e atu ita tasak liután, ne’e la buat ida, importante nia hotu, to’o inaugurasaun mós ema sei posting dehan pároku ne’e Os Verdes nia ema karik, tanba ninia kór ne’e haleu ho matak hotu ne’e,” Padre ne’e haktuir.
Nai-lulik ne’e hatutan, obra ne’e foin halo pagamentu 80% ba empreza tanba sei kompleta tán fasilidade balun iha uma nia ninin sira.
Amu-lulik ne’e agradese ba parte hotu ne’ebé apoia direita no indireta, liuliu ba komisáriu Autoridade Áduaneira (ALFÁNDEGA) tamba ho nia esforsu tomak sasán sira hanesan besi baja bele tama hosi Indonézia mai Timor-Leste ho monta iha salaun refere.
Notísia relevante: Xanana entrega estatua Na’i-Feto hosi Portugal ba Dioseze Maliana
Jornalista : Sérgio da Cruz
Editór : Evaristo Soares Martins
