VIQUEQUE, 08 maiu 2023 (TATOLI)--Ministériu Obra Públika (MOP) halo ona koordenasaun ho empreza lokál hodi normaliza dalan sira-ne’ebé ho kondiasaun a’at liga bá sentru votasaun sira iha munisípiu Viqueque.
“Empreza normaliza ona dalan hosi Uatulari bá Nunu Malau no Irabere. Ministériu orienta empreza sira hodi normaliza de’it dalan sira-ne’ebé kotu, sira la halo normaliza hotu,” Diretór Servisu Obra Públika munisípiu Viqueque, Mário do Rego, hateten ba Agência Tatoli, iha Viqueque Villa, segunda ne’e.
Empreza hahú halo intervensaun dalan sira-ne’ebé liu ladi’ak iha parte Uatulari, iha sábadu semana kotuk.
“Maibé ho kondisaun udan hela maka labele aselera. Aban empreza sei halo intervensaun dalan iha postu Uatucarbau, hahú normaliza dalan hosi suku Loi-Hunu bá Bahatata. Ida-ne’e mós ita-nia empreza sira sei normaliza de’it dalan sira-ne’ebé karreta liu ladi’ak,” nia akresenta.
Notísia relevante : Autoriedade Viqueque husu MOP hadia dalan liga ba sentru votasaun
Diretór informa, parte ministériu halo ona koordenasaun ho empreza hodi normaliza dalan iha parte postu Ossu nian, liu-liu dalan sira liga bá sentru votasaun hanesan área Nahereka inklui parte Lacluta.
“Ita sente difikulta serbisu tanba ho kondisaun udan maibé ita fiar katak molok tama eleisaun dalan sira-ne’ebé ita liu ladi’ak ne’e bele asesu ona sentru votasaun,” nia tenik.
Iha fatin ketak, Diretór Sekretariadu Tékniku Administrasaun Eleitóral (STAE) munisípiu Viqueque, Humberto Fernandes, informa, parte tékniku sira identifika ona dalan bá sentru votasaun hamutuk 17 ho kondisaun a’at.
“Dalan ho kondisaun a’at ba sentru votasaun mak hanesan postu haat hanesan Lacluta, Uatulari, Ossu no Viqueque Villa iha sentru votasaun Uelolo, ida-ne’e ami sente difísil tanba mota agora halai tuir de’it dalan ne’ebé ita haree hanesan lagoa ida,” nia akresenta.
STAE mós prevee osan hadi’a dalan ne’ebé labele liu hodi transporta materiál eleisaun bá sentru votasaun
“Ami iha dalan alternativu rasik, bainhira ami haree karreta labele asesu ba sentru votasaun, ami sei selu abitante sira hodi ajuda lalin sasán, hakarak ka lakoi materiál tenke to’o fatin sentru votasaun,” nia tenik.
Jornalista : Vitorino Lopes da Costa
Editora : Julia Chatarina
