ERMERA, 08 maiu 2023 (TATOLI) – Partido Socialista de Timor (PST), iha ninia kompromisu polítika halo iha Postu Adminsitrativu Hatulia B, munisipiu Ermera hateten, sei defende rai plantasaun kafé iha Hatulia B bazeia ba direitu kustumeiru.
“Se povu fó fiar iha tinan ida ne’e nia laran, ita sei aprezenta projeto de lei atu define saida mak direitu kustumeiru ka lisan (Hukum Adat). Lisan mak hatuur sivilizasaun no regras iha ita-nia rai laran,” Prezidente PST, Avelino Coelho afirma ba Militante no Simpatizante iha Suku Fatubolu, Postu Administrativu Hatulia B, Munisípiu Ermera, segunda ne’e.
Nia dehan rai pretense ba lisan suku ida nian, sei labele sai proprietáriu ba lisan husi suku seluk.
“Ita persiza kuadrus jurídiku atu defende rai bazeia ba lisan no knua. Bainhira ita koli’a kona-ba defende povu nia direitu, ita tenke iha kuadru legál. PST preparadu atu aprezenta projeto de lei kona-ba defende povu nia rai. Entaun atu defende povu nia rai tenke defende uluk povu nia liasan,” líder partidu ne’e esplika.
Nia dehan lisan mak regula kultura no kustume feto-sa-umane no distribuisaun rai bazeia ba lisan.
“Antes malae mai Timor, ita ukun aan nanis ona. Rai iha suku Fatubolu ne’e fahe ona ba maun alin sira. La’ós malae mai mak fahe, maibé malae mai hadau. Hau rona dehan, plantasaun kafé Fatubesi ne’e Governu fó ona ektare 4,000 ba kompañia balu. Se PST manan, tenke revee hodi haree prosesu hanusa mak rai ne’e entrega ba kompañia refere,” Avelino promote.
Ho nune’e, nia dehan PST sei konsistente hodi defende direitu povu nian ba rai: “Entaun rai ne’e tenke fó fila ba povu ho modelu oi-oin.”
“PST kontinua defende direitu povu nian ba rai, tanba povu mak nain ba rai ida ne’e, la’ós de’it iha Fatubesi maibé Ermera no Timor laran tomak,” Avelino konklui.
Notísia relevante:https://tatoli.tl/2023/05/08/pst-sei-loke-fabrika-kafe-iha-glenu/
Jornalista: Filomeno Martins
Editora: Nelia Borges
