iklan

HEADLINE, KAPITÁL

IGEADE, I.P garante normaliza estrada ligasaun ba sentru votasaun sira

IGEADE, I.P garante normaliza estrada ligasaun ba sentru votasaun sira

Prezidente Konsellu Administrasaun IGEADI, I.P, Ermenegilda da Costa Laurentina. Imajen Tatoli /Egas Cristóvão

DILI, 10 maiu 2023 (TATOLI)—Prezidente Konsellu Administrasaun Institutu Jestaun Ekipamentu no Apoiu Dezenvolvimentu Infraestrutura, Institutu Públiku (IGEADE, I.P), Ermenegilda da Costa Laurentina, hateten, sira-nia parte kontinua esforsu rezolve estrada a’at iha territóriu laran ne’ebé liga bá sentru votasaun sira.

“Ami garante halo esforsu másimu halo melloramentu, normalizasaun no manutensaun ba estrada sira hodi fasilita ita-nia komunidade asesu ba Eleisaun Parlamentár 2023, tanba ita-nia brigada sira estabelese hotu iha munisípiu sira hodi apoiu serbisu iha terrenu,” Ermenegilda da Costa Laurentina, hateten iha ninia knaar fatin, Colmera, kuarta ne’e.

Notísia relevante : Hasoru ElPar, IGEADE,I.P finaliza pedidu 300 resin 

Antes ne’e, jerente institutu simu orientasaun hosi Primeiru-Ministru (PM), Taur Matan Ruak, iha janeiru 2023, atu halo normalizasaun estrada sira iha área rurál liga ba sentru votasaun sira.

“Bainhira simu orientasaun hosi Primeiru-Ministru, ekipa tun kedas bá terrenu hodi normaliza estrada. Horiseik sira halo apoiu emerjénsia iha postu administrativu Natarbora, munisípiu Manatuto, tanba iha dalan kotu, ne’ebé finaliza ona,” nia akresenta.

Nia dehan, IGEADE, I.P kontinua esforsu halo melloramentu estrada, maibé karik parte balun labele kontinua serbisu maka institutu sei liga ba parte Diresaun Jerál Ministériu Obra Públika (MOP) hodi husu apoiu ba kompañia privadu sira atu halo atendimentu emerjénsia hodi fasilita komunidade partisipa iha eleisaun.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!