DILI, 10 maiu 2023 (TATOLI)—Prezidente Konsellu Administrasaun Institutu Jestaun Ekipamentu no Apoiu Dezenvolvimentu Infraestrutura, Institutu Públiku (IGEADE, I.P), Ermenegilda da Costa Laurentina, hateten, nia parte orienta ona ekipa téknika normaliza mota Laklo.
“Ami iha ona fotografia inundasaun ne’ebé mak akontese iha munisípiu Maunfahi. Horiseik ha’u orienta kedas ha’u-nia ekipa, liu-liu Briagada Rosa Muki Bonaparte ne’ebé agora destaka hela iha Manufahi no serbisu hela iha Caikasa, Natarbora no Laklo, entaun parte Caicasa nian mak sei ba apoiu serbisu, loloos ne’e atu tun horiseik maibé tanba sira tun mai foti kombustível, entaun ohin foin ba apoiu,” Ermenegilda da Costa, informa ba Agência Tatoli, iha ninia knaar fatin, Colmera, kuarta ne’e.
Notísia Relevante : Autoriedade Manufahi husu Governu sentrál normaliza Mota Laklo
Nia dehan, antes ne’e institutu simu ona pedidu emerjénsia normaliza mota Laclo ne’ebé tama komunidade nia to’os no estraga uma kuaze 115 iha suku Uma-Berloic, postu administrativu Alas, munisípiu Manufahi.
Nune’e, Brigada Rosa Muki Bonaparte sei ba apoiu tanba briagada ne’e rasik responsabiliza ba munisípiu Manatuto, Manufahi no Ainaro.
Jornalista : Arminda Fonseca
Editora : Julia Chatarina
