Materiál eleisaun parlamentár to’o ona iha Bobonaro
MALIANA, 12 Maiu (TATOLI)-Materiál eleisaun parlamentár komposta hosi sensitivu no la’ós-sensitivu hamutuk kaixa 15, ne’ebé transporte hosi Dili, Sesta ne’e to’o ona iha iha edifísiu Sekretariadu Tékniku Administrasaun Eleitorál Munisípiu Bobonaro.
Material hirak-ne’e to’o iha munisípiu Bobonaro iha tuku 15:40 oras Timor-Leste ne’ebé simu direita hosi Brigada (STAE).
Durante prosesu transportasaun materiál hirak+ne’e akompaña hosi Komisaun Nasionál Eleisaun (CNE, sigla portugés) no hetan seguransa másimu hosi Polísia Nasionál Timor-Leste, komandu munisípiu Bobonaro no Batallaun Orden Públika.
Notísia relevante: STAE Bobonaro ho autoridade sivíl-militár diskute preparasaun ba eleisaun
“ita simu bulentin votu ninia karimbu, urna, silus xave urna nia tinta, ne’e ami hodi mai kompletu ona, bulentin votu ne’e iha kaixa 15 bazea ba ita-nia totál eleitór ne’ebé mak iha,” Diretór STAE munisípiu Bobonaro, Mariano Amaral, ko’alia iha Maliana.
Mariano subliña, aban ekipa sira sei halo prosesu verifikasaun ba materiál hirak-ne’e.
“Ami mós antes ne’e fó ona konvite liuliu ba observadór, mídia komunikasaun, fiskál partidu lolítiku sira-ne’ebé eziste iha munisípiu Bobonaro, bainhira hahú verifikasaun karik bele mai partisipa ba to’o prosesu pakotementu depois prosesu distribuisaun materiál ba sentru votasaun,” Mariano dehan.
Enkuantu dadaun ne’e membru PNTL kontinua halo seguransa iha edifísiu STAE munisípiu Bobonaro to’o rezultadu apuramentu munisipál remata.
Totál eleitór munisipiu Bobonaro ne’ebé elijível atu vota iha eleisaun larlamentár fulan ne’e hamutuk na’in-72.537 komposta hosi mane na’in-37.335 reprezenta (51%) no feto na’in-35.202 reprezenta (49%).
Notisia relevante: STAE Bobonaro hahú halo espozisaun lista eleitór iha suku 50
Jornalista: Sérgio da Cruz
Editór: Evaristo Soares Martins
