Prezidénsia Repúblika lansa livru “Erói” no “Tradisaun Kultura Hamulak Mambae Maubisse”
DILI, 12 maiu 2023 (TATOLI)—Prezidénsia Repúblika, sesta ne’e, lansa livru ho títulu “Erói” no “Koñese Expresaun Literatura Lisan Orál Tradisaun Hamulak Mulo-Aituturina” ka “Tradisaun Kultura Hamulak Mambae Maubisse” hosi eskritora Alexandra Tilman iha Palásiu Prezidensiál Nicolau Lobato, Bairru Pité, Dili.
Notísia Relevante: Sandra Tilman hetan rekoñesimentu internasional nu’udar “Best Focal For Poetry”
“Ohin, lansa livru rua ho nia títulu ‘Erói’ ida fali ho títulu “Koñese Expresaun Literatura Lisan Orál Tradisaun Hamulak Mulo-Aituturina (Mambae)”. Livru rua ne’e kompila espresaun hosi ha’u rasik liuhosi observasaun, sentimentu, peskiza. Entaun, konsege halibur livru ne’e, nia prosesu kle’ur tebes, hodi halo netik buat ruma kiik hanesan jerasaun foun ba rai ne’e, hanesan sidadaun hamutuk ho Estadu hodi fó netik kontribuisaun liuhosi liña literatura, kultura no turizmu ne’ebé daudaun ita promove hela,” Eskritora Alexandre Tilman hateten ba jornalista sira iha Palásiu Prezidensiál, sesta ne’e.
Nia hatutan, durante prepara livru ne’e lori tinan haat tanba iha revizaun ida-ne’e mak kle’ur, tanba nia parte hakerek livru ida hakarak reprezenta mós ema seluk nia fuan no labele lori ninia fuan de’it.
“Ha’u-nia meta mak ne’e, bainhira halo obra ida, obra ne’e la’ós ha’u de’it mak sente de’it maibé bainhira lee-na’in sira sente, sira mós bele monu ba iha livru ne’e nia laran rasik. Katak, saida mak sira sente, ida-ne’e duni mak expresaun ha’u reprezenta hanesan hakerek-na’in ida mós,” nia dehan.
Prosesu hakerek laiha dezafiu ruma tanba nia parte iha ona modalidade vontade no iha ona bala musan ba liafuan, tanbá badinas lee la susar hamosu ideia iha kaligrafia livru ida-nia leten.
Kona-ba apoiu orsamentu atu emprime livru rua ne’e, nia esforsu nia rasik ho apoiu morál hosi família no maluk sira seluk ne’ebé nafatin apoiu, maske neineik maibé hamriik hodi hateten katak nia mós bele.
Livru “Erói” iha pájina hamutuk 156 no livru ida seluk kona-ba kultura nian ho titulu “Koñese Expresaun Literatura Lisan Orál Tradisaun Hamulak Mulo-Aituturina (Mambae)” ne’e iha pájina hamutuk 50-resin, ne’ebé ko’alia kona-ba istória Timor no kultura.
Adjunta Kaza Sívil iha Prezidénsia Repúblika, Maria da Silva Henrique, hateten ho eskritora nia kontribuisaun mak ohin loron Prezidente Repúblika halo lansamentu, no livru sira-ne’e bele fasilita estudante sira hodi halo leitura, atu aumenta sira-nia koñesimentu kona-ba istória no kultura.
Agência Tatoli cita hosi eskritora Alexandra Tilman nia varanda facebook haktuir, hanesan jerasaun foun lalika sisi liu sasán wa’in ba rai ne’e, maibé mai hamutuk prepara-an halo netik buat ruma ba rai ida-ne’e.
Tanba ne’e, nia hato’o agradesimentu wa’in ne’ebé la nahas ba Xefe Estadu, José Ramos Horta ne’ebe mak simu ona pedidu hodi hetan ona despaixu ba preparasaun lansamentu ba livru ho titlu “EROI” no mós “Tradisaun Kultura Hamulak Mambae Maubisse”.
“Objetivu jerál hosi obra livru no lansamentu ne’e mak sei apoiu mundu Literatura Timor-nian, liu-liu iha setór edukasaun. Hadomi Lee, Hadomi Hakerek atu saida mak ita aprende no komprende labele lakon leet de’it,” eskritora ne’e hakerek iha ninia varanda facebook.
Notísia Relevante: Poetiza husu Governu dedika loron ida ba “Loron Nasionál Ba Poezia”
Jornalista : Nelson de Sousa
Editór : Cancio Ximenes
