iklan

ERMERA, MUNISÍPIU

CCT apoiu komunidade kuda plantasaun industriál haat

CCT apoiu komunidade kuda plantasaun industriál haat

José Almeida dos Santos, Supervisor Prosesamentu Fábrika CCT (Imagem Tatoli/Filomeno Martins)

ERMERA, 15 maiu 2023 (TATOLI)Cooperativa Café Timor (CCT) kada tinan apoiu komunidade Munisípiu Ermera no munisípiu seluk kuda planta industriál hanesan Baunila, Kakau, Kraviñu (Cenkeh), no Pimenta.

“Ita depende de’it ba kafé ne’ebé mak ita-nia avó kuda maibé, kafé nia produsaun tuun ba bebeik no rendimentu kafekultór nian mós tuun. Tanba ne’e mak ita promove plantas industriais haat hanesan baunila, kakau, Cenkeh, no Pimenta,” José Almeida dos Santos, Supervizór Prosesamentu Fábrika CCT ba Tatoli, iha nia knaar fatin, Railako, Munisípiu Ermera, segunda ne’e.

Nia dehan, CCT promove no apoia komunidade kuda kakau tanba nia produsaun nunka atu para. “Tanba ne’e mak promosaun ba Kakau importante tebes tanba lori rendimentu di’ak ba komunidade no nasaun.”

“CCT mós promove baunila no enkoraza komunidade kontinua kuda baunila. Iha Munisípiu Ermera, ita distribui baunila ba suku Leimea Sorin Balu, Fatubesi, Matata no seluk tan. baunila ne’e serbisu todan maibé nia valór ekonomia ne’e aas. Ida ne’e sei lori rendimentu di’ak hodi hadi’a ekonomia uma laran,” José esplika.

Alende kafé, tuir nia, CCT kontinua halo promosaun ba plantas industriais tanba sei lori rendimentu bo’ot ba komunidade.

“Kada tinan CCT fahe Pimenta oan 10,000 ba komunidade sira kobre Liquiça, Ermera, Aileu, Same no Suai. Iha tinan kotuk, ita fahe Kakau oan hamutuk 15,000 ba agrikultór sira iha Viqueque, Covalima, Lautém, Baucau no Ermera. Ita mós distribui Cenkeh oan 8,000 ba komunidade sira kada tinan no distribui mós baunila oan. CCT disrtribui ai-oan sira ne’e direta ba komunidade nia fatin ho gratuita,” José relata.

Nia informa katak CCT bainhira distribui baunila oan, distribui mós adubus orgániku: “CCT nia ekipa tékniku sira sempre apoiu komunidade sira atu kuda baunila ho maneira ne’ebé lolos.”

Nia esplika, CCT mós loke merkadu atu komunidade sira bele faan sira-nia rezultadu produsaun husi plantas industriais sira ne’e.

“Ami apoia komunidade kuda plantas industriais, ami rasik mak loke merkadu ba sira hodi sosa sira-nia produtu. Agora dadaun, CCT sosa baunila kada kilograma $18 ba klase A no klase B $16. Ami sosa Kakau musan (Green Bean) kada kilo $1,75, Pimenta Kilograma ida $7, no Cenkeh kilograma ida $7,” José informa.

Notísia relevante:CCT reabilita ona kafé ektare 200 iha Ermera

 

Jornalista: Filomeno Martins

Editora: Nelia Borges

 

iklan
iklan

Leave a Reply

iklan
error: Content is protected !!