Empreza TBEA finaliza projetu instalasaun transformadór 40MVA Camea
DILI, 17 maiu 2023 (TATOLI)—Empreza Insternational Engineering TBEA ofisialmente entrega projetu enjiñaria kompra no konstrusaun transformadór 40MVA iha sub-estasaun Camea ne’ebé finaliza ona ba Eletricidade de Timor-Leste, Empreza Públika (EDTL, E.P).
“Ha’u apresia ba esforsu EDTL,E.P nian ba instalasaun transformadór foun ho kapasidade 40MVA ne’e, husu EDTL, E.P ba oin utiliza ho di’ak hodi reforsa servisu distribuisaun no hadi’a liután kualidade fornesimentu enerjia elétrika ba kliente sira iha munisípiu Dili,” Ministru Obra Públika, Abel Pires da Silva, hateten liuhosi nota ne’ebé Agência Tatoli asesu, kuarta ne’e.
Notísia relevante : EDTL,E.P sei distribui solar panel hamutuk unidade 1.091 ba komunidade
Nia parte mós husu ba tékniku sira ne’ebé durante ne’e serbisu iha sub-estasaun hotu iha Timor laran tomak, atu nafatin apreende nune’e iha futuru timor-oan rasik mak sei halo operasaun ba sistema instaladu.
“Husu mós ba empreza TBEA, ita-boot sira-nia matenek ne’ebé iha bele transfere ba tékniku sira ne’ebé daudaun ne’e hala’o serbisu iha sub-estasaun sira hodi nune’e sira bele halo serbisu ho di’ak tanba sistema ne’e krusiál,” nia akresenta.
Embaixadór Xina iha Timor-Leste, Xiao Jianguo, hateten, Repúblika Populár Xina komprometidu ba oin kontinua apoiu nafatin no serbisu hamutuk ho Timor Leste iha área eletrisidade.
“Ha’u hato’o parabéns ba funsionáriu EDTL, E.P tomak ne’ebé inisia no esforsu hodi implementa projetu konstrusaun no instalasaun transformadór 40 MVA ne’e, nune’e bele finaliza iha fulan-neen nia-laran,” nia apresia.
Iha biban ne’e, Jerente EDTL, E.P entrega sertifikadu rekoñesimentu ba empreza TBEA, ne’ebé implementa ona projetu hodi termina ho susesu.
Jornalista : Arminda Fonseca
Editora : Julia Chatarina
