iklan

ELEISAUN, MUNISÍPIU, VIQUEQUE

Autoridade Viqueque husu brigadista STAE serbisu ho responsabilidade no imparsiál

Autoridade Viqueque husu brigadista STAE serbisu ho responsabilidade no imparsiál

VIQUEQUE, 20 maiu 2023 (TATOLI)Administradór munisípiu Viqueque, Januário Soares ‘Bolly’, husu ba brigadista sira hosi Sekretariadu Tékniku Administrasaun Eleitorál (STAE) Viqueque atu serbisu ho responsabilidade no imparsiál hodi fó satisfasaun ba ema hotu iha Eleisaun Parlamentár iha loron 21 maiu 2023.

“Ohin ita komemora restaurasaun independénsia Timor-Leste ba da-XXI, ne’ebé komemora ho simples, ita mós halo kedas distribuisaun materiál sensitivu no la sentivu ba fatin votasaun sira iha munisípiu Viqueque. Resposabilidade brigadista maka lori materiál bá sentru votasaun ho kuidadu no di’ak hodi bele to’o iha fatin ho susesu no labele mosu asidente no insedente ruma. Ha’u husu brigadista sira ezekuta funsaun ho profisionál, imparsialidade no neutralidade, nune’e partidu polítiku sira bele simu rezultadu, se lae ita kria fali problema iha ita-nia sosiadade hodi kria situasaun la kalma,” Administradór hateten iha serimónia distribuisaun materiál sensitivu no la sensitivu ba fatin votasaun, iha resintu Administrasaun Viqueque, sábadu ne’e.

Atividade distribuisaun materiál realiza hafoin serimónia isar bandeira nasionál iha ámbitu komemorasaun loron restaurasaun independénsia ba da-XXI.

Nia fó hanoin, brigadista sira tenke ezerse knaar ho profisionál atu labele kria konfuzaun, enkuantu fiskál sira bainhira atubhalo protestu ruma tenke prienxe formuláriu nune’e bele hetan solusaun ruma iha munisípiu no nasionál.

“Ha’u husu ba responsável fiskál sira labele enterompe prosesu eleisaun tanba oráriu eleisaun tenke hotu iha tuku 15:00 lorokraik. Nune’e mós, ha’u husu ba parte seguransa ne’ebé akompaña materiál eleisaun, karik tenke akompaña ho di’ak no susesu, nune’e aban ita-nia eleitór sira bele ezerse sira-nian direitu,” nia akresenta.

Notísia relevante : Diretór STAE Viqueque preokupa dalan liga bá sentru votasaun seidauk normaliza

Aleinde ne’e, Autoridade munisipál ne’e husu sidadaun ho idade elejível sira iha munisípiu Viqueque atu partisipa votasaun hodi hasa’e taxa partisipasaun iha Eleisaun Parlamentár períodu ne’e.

Iha fatin hanesan, Diretór STAE Viqueque, Humberto Fernandes, hateten, órgaun eleitorál sira sei hala’o knaar ho di’ak iha festa demokrasia ne’e.

“Ha’u agradese ba instituisaun sira hotu nia kontribuisaun no kolaborasaun hodi fó apoia no suporta ba orgaun STAE no Komisaun Nasionál Eleisaun (CNE, sigla portugés) nune’e eleisaun ida-ne’e la’o ho di’ak no susesu,” nia otimista.

Tuir dadus, materiál ba Eleisaun Parlamentár ho totál livru hamutuk 3.309, folla 65.450, iha kaixa 12.

Eleitór rejistadu ba tinan ne’e iha munisípiu Viqueque hamutuk na’in-58.566, enkuantu sentru votasaun estabelesidu 112 no estasaun votasaun 135.

Tuir observasaun jornalista Agência Tatoli iha terrenu, nota katak ekipa responsável distribui materiál ho di’ak, ne’ebé akompaña hosi entidade relevante. Hafoin remata entrega materiál kontinua asina akta distribuisaun materiál hosi Diretór STAE Viqueque, Diretór CNE inklui Komandante PNTL munisípiu Viqueque.

Atividade distribuisaun materiál hahú iha maizumenus tuku 10:35 dadeer iha resintu Administrasaun munisipál no mobiliza kedan ba sentru votasaun estabelesidu ho karreta aluger hamutuk 25 inklui karreta Estadu 30.

Jornalista     : Vitorino Lopes da Costa
Editora          : Julia Chatarina

iklan
iklan

Leave a Reply

iklan
error: Content is protected !!